मुक्ताईनगर तालुक्यातील घटना
मुक्ताईनगर (प्रतिनिधी) : शहरातील उड्डाणपुलावर ट्रॅक्टर घेऊन जाणाऱ्या कंटेनरला ओव्हरटेक करत असताना रस्त्यावर दुचाकी घसरल्याने व दुचाकीस्वार कंटेनरच्या चाकाखाली आल्याने जागीच ठार झाल्याची घटना मंगळवारी दि. २५ जून रोजी दुपारी ४ वाजेच्या सुमारास घडली आहे. तर त्याच्यासोबत असलेला दुसरा तरूण किरकोळ जखमी झाला आहे. मुक्ताईनगर पोलीस स्टेशनला गुन्हा दाखल करण्यात आला आहे.
अनिल छोटू डागोर (वय-४०, रा. रामदेव बाबा नगर, मलकापूर, जि. बुलढाणा) असे मयत झालेल्या दुचाकीस्वाराचे नाव आहे. मलकापूर येथील रेल्वे स्टेशनचे साफसफाईचा ठेका घेवून अनिल उदरनिर्वाह करत होता. अनिल छोटू डागोर हा तरुण मित्र अभिषेक टाक याच्यासोबत मंगळवारी दि. २५ जून रोजी दुपारी मलकापूरकडून भुसावळकडे जाण्यासाठी दुचाकीने निघाले होते. त्यावेळी मलकापूरहून जळगावकडे जाणारा ट्रॅक्टर घेऊन जाणारा कंटेनर पुढे जात होता. दुपारी ४ वाजेच्या सुमारास दुचाकीस्वार अनिल डागोर याने कंटेनरला ओव्हरटेक करत असताना रस्त्यावर पडलेल्या पाण्यामुळे त्याची दुचाकी घसरली.
त्यामुळे तो कंटेनरच्या क्लीनर भागाच्या मागच्या चाकात आल्याने त्याचा मृत्यू झाला. तर मागे बसलेला अभिषेक टाक थोडक्यात बचावला आहे. दरम्यान ही घटना घडल्यानंतर महामार्गावर काही वेळ वाहतुकीची कोंडी झाली होती. घटनास्थळी मुक्ताईनगर पोलिसांनी धाव घेतली व मृतदेह मुक्ताईनगर ग्रामीण रुग्णालयात दाखल करण्यात आला आहे. या घटनेमुळे परिसरात हळहळ व्यक्त केले जात आहे. मुक्ताईनगर पोलीस स्टेशनला गुन्हा दाखल करण्यात आला आहे.