दोन मोटार सायकली जप्त
जळगाव (प्रतिनिधी) :- जळगाव शहरातील नवीन बसस्थानक परिसरातून दुचाकी चोरी करणाऱ्या मालेगावच्या सराईत टोळीला जेरबंद करण्यात जिल्हापेठ पोलिसांना यश आले आहे. या कारवाईत पोलिसांनी चोरीच्या दोन मोटार सायकली जप्त केल्या आहेत.
जळगाव नवीन बसस्थानक येथून एक मोटार सायकल चोरीला गेल्याप्रकरणी २६ फेब्रुवारी रोजी जिल्हापेठ पोलीस ठाण्यात गुन्हा दाखल करण्यात आला होता. या गुन्ह्याचा तपास करत असताना प्रभारी अधिकारी अनिल वाघ यांना मिळालेल्या गोपनीय माहितीच्या आधारे शोध पथकाने तांत्रिक विश्लेषण केले. त्यावरून मालेगाव येथील तीन संशयितांना ताब्यात घेण्यात आले.
ताब्यात घेतलेल्या आरोपींची नावे मलीक अल्ताफ अहमद अन्सारी, मोहम्मद मुज्जमील अब्दुल खालक आणि अबुबकर नईम कौसर (सर्व रा. मालेगाव) अशी आहेत. पोलिसांनी त्यांच्याकडे सखोल चौकशी केली असता, त्यांनी धक्कादायक माहिती दिली. हे तिघे नाशिक येथून जळगावला टीव्हीएस रायडर (क्र. एमएच १५ जेएफ ३६०९) मोटार सायकलने आले होते.
जळगावात आल्यावर त्यांनी तीच गाडी एका साक्षीदाराला विकली आणि कागदपत्रे नंतर देतो असे सांगून त्याला आपल्याला बसस्थानकावर सोडण्यास सांगितले. त्यानंतर बसस्थानकावरून त्यांनी हिरो होंडा स्प्लेंडर प्लस (क्र. एमएच १९ बीएस १५७३) ही गाडी चोरून मालेगावला पळ काढला होता.
न्यायालयाने आरोपींना तीन दिवसांची पोलीस कोठडी सुनावली असून, कोठडीत त्यांनी गुन्ह्याची कबुली दिली आहे. पोलिसांनी दोन्ही मोटार सायकली जप्त केल्या असून पुढील तपास पोलीस नाईक संतोष सोनवणे करत आहेत.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे आणि प्रभारी अधिकारी अनिल वाघ यांच्या मार्गदर्शनाखाली करण्यात आली. या पथकात पोलीस उपनिरीक्षक शांताराम देशमुख, महेश महाजन, नरेश सोनवणे, संतोष सोनवणे, तेजस मराठे, राहुल पाटील, नरेंद्र दिवेकर, अमित मराठे आणि प्रवीण जाधव यांचा समावेश होता.
