यावल बस स्थानकातील घटना
यावल (प्रतिनिधी) : येथील बसस्थानकावर प्रवासासाठी आलेल्या पारोळा येथील ५५ वर्षीय महिलेच्या गळ्यातील सव्वा लाख रुपये किमतीची सोन्याची पोत अज्ञात चोरट्याने चोरी केली आहे. सदर घटना सोमवारी घडली होती. तेव्हा याप्रकरणी यावल पोलीस ठाण्यात महिलेने दिलेल्या फिर्यादीवरून बुधवारी अज्ञात चोरट्याविरुद्ध चोरीचा गुन्हा दाखल करण्यात आला आहे.
यावल बसस्थानकावर अंजली किशोर जैन (वय ५५ रा. बालाजी मंदिराजवळ, पारोळा) या महिला प्रवासासाठी आल्या होत्या. त्या दहिगाव येथून यावल व यावल येथून पारोळा जाणार होत्या. दरम्यान गर्दीत एसटीत बसत असताना त्यांच्या गळ्यात असलेली सोन्याची मंगलपोत जिची किंमत १ लाख २३ हजार १९६ रुपये होती. ती कोणीतरी अज्ञात चोरट्याने चोरी केली. सदर प्रकार निदर्शनास आल्यानंतर अंजली जैन यांच्या फिर्यादीवरून यावल पोलीस ठाण्यात अज्ञात चोरट्याविरुद्ध चोरीचा गुन्हा दाखल करण्यात आला आहे. पुढील तपास पोलीस निरिक्षक प्रदीप ठाकूर यांच्या मार्गदर्शनाखाली पोलीस उपनिरीक्षक सुनील मोरे करीत आहे.
