महिला मंडळ अधिकार्‍यास वाळू व्यावसायिकाची धक्काबुक्की, ट्रॅक्टर घेऊन फरार
यावल तालुक्यातील बामणोद येथील घटना, दोघांवर गुन्हा दाखल
यावल (प्रतिनिधी) – तालुक्यातील बामणोद येथील महिला मंडळ अधिकार्‍यांना गुरुवारी साकळी, शिरसाड परिसरात अवैध वाळू वाहतूक पकडल्यानंतर परवान्याबाबत विचारणा करीत असताना वाळू व्यावसायिकाने दमदाटी व शिवीगाळ करीत धक्काबुक्की केली. तेथून ट्रॅक्टर घेत फरार झाला. याप्रकरणी यावल पोलीस ठाण्यात वाळूमाफियाविरुद्ध गुन्हा दाखल करण्यात आला.
यावल तालुक्यातील बामणोद येथील महिला मंडळ अधिकारी बबिता चौधरी या ३१ ऑगस्ट रोजी साकळी, शिरसाड परिसरात वाळूसाठा देखरेखीसाठी पर्यवेक्षक म्हणून कर्तव्य बजावत होते. या परिसरात रस्त्यात अवैध वाळू वाहतूक करीत असताना त्यांना ट्रॅक्टर दिसून आले. ट्रॅक्टरचालकाला थांबवीत वाळू वाहतुकीचा परवाना आहे किंवा नाही, याबाबतची माहिती विचारली. त्यावेळी या वाळू व्यावसायिकाने मंडळ अधिकारी बबिता चौधरी यांना शिवीगाळ करीत धक्काबुक्की केली आणि तो ट्रॅक्टरसह पसार झाला.
साकळी मंडळात वाळूमाफियांकडून मंडळ अधिकार्‍यावर हल्ला करण्याची ही दुसरी घटना घडल्याने महसूल कर्मचार्‍यांनी शासकीय काम कसे करावे, असा प्रश्न उपस्थित झाला आहे. मंडळ अधिकारी बबिता चौधरी यांनी दिलेल्या फिर्यादीवरून यावल येथील पोलीस ठाण्यात अज्ञात अवैध वाळू व्यावसायिक निलेश समाधान सोनवणे (रा. थोरगव्हाण ता. यावल) व एका अज्ञात ट्रॅक्टर चालक यांच्याविरुद्ध गुन्हा दाखल करण्यात आला आहे. तपास पीएसआय मोरे करीत आहेत. दरम्यान, यावल तालुक्यात सर्वाधिक साकळी आणि बामणोद मंडळात तापी नदीकिनारपट्टीवरून अवैध गौण खनिज उत्खनन, वाहतूक व उपसा केला जातो. अवैध वाळू व्यावसायिकांची हिंमत, दादागिरी दिवसेंदिवस वाढत असून त्यावर थेट कारवाई झाली पाहिजे, असे नागरिकांचे म्हणणे आहे.
