जळगाव ( प्रतिनिधी ) – जिल्हा बॅंकेवर महाविकास आघाडीच्या सहकार पॅनलचे २१ पैकी २० उमेदवार निवडून आले आहेत. एक अपक्ष उमेदवार भाजपचे आमदार संजय सावकारे अपक्ष म्हणून निवडून आले आहेत.
सहकार पॅनलचे उमेदवार डॉ. सतीश पाटील, गुलाबराव देवकर, ॲड. रोहिणी खडसे विजयी झाल्या. राखीव सहा मतदार संघात सहकार पॅनलने बाजी मारली आहे. संस्था मतदार संघात सहकार पॅनलचे माजी मंत्री गुलाबराव देवकर विजयी झाले. त्यांना १ हजार ५०१ मते मिळाली.
जिल्हा बँक निवडणुकीत इतर मागासवर्ग मतदार संघात सहकार पॅनलचे माजी मंत्री डॉ. सतीश पाटील विजयी झाले. त्यांना २ हजार ३१६ मते मिळाली. त्यांचे विरोधी विकास पवार यांना २४२ मते मिळाली. अनुसूचित जाती जमाती मतदार संघातून सहकार पॅनलचे श्यामकांत सोनवणे विजयी झाले. त्यांना २ हजार ४६४ मते मिळाली. व्हीजेएनटी मतदार संघात सहकार पॅनलचे मेहताबसिंग नाईक विजयी झाले. त्यांना २ हजार ३२८ मते पडली. महिला राखीव मतदार संघात सहकार पॅनलच्या ॲड.रोहिणी खडसे व शैलजा निकम विजयी झाल्या. श्रीमती खडसे यांना २ हजार २३५ मते मिळाली. तर श्रीमती निकम यांना १ हजार ९२५ मते मिळाली आहेत.
जिल्हा बँकेच्या संचालक मंडळाच्या निवडणुकीत चोपडा तालुका विविध कार्यकारी सहकारी सेवा सोसायटी मतदारसंघातून राष्ट्रवादीचे घनश्याम अग्रवाल ६४ पैकी ६३ मते घेऊन विजयी झाले आहेत . विधानसभेचे माजी अध्यक्ष अरुण गुजराथी यांच्यासाठी ही जागा प्रतिष्ठेची होती . यावल तालुका विविध कार्यकारी सहकारी सेवा सोसायटी मतदारसंघातून विनोद पंडितराव पाटील २६ मतांनी विजयी झाले आहेत . त्यांचे प्रतिस्पर्धी भाजपचे गणेश नेहते यांना २२ मते मिळाली . रावेर तालुक्यातून माजी आमदार अरुण पाटील यांना जाहीर पाठिंबा देणाऱ्या जनाबाई महाजन विजयी झाल्या . विशेष म्हणजे माजी आमदार अरुण पाटील यांना २५ आणि जनाबाई महाजन यांना २६ मते मिळाली !
