जळगाव, धुळे, नंदुरबारसह राज्यातील योग शिक्षक एकवटले!
जळगाव ( प्रतिनिधी ) – शारीरिक आणि मानसिक स्वास्थ्यासाठी योगाचा प्रसार करण्याच्या उद्देशाने, महाराष्ट्र योग शिक्षक संघाच्या वतीने जळगाव शहरातील मायावती नगर येथील रोटरी भवनमध्ये शनिवारी (२८ फेब्रुवारी) एकदिवसीय राज्यस्तरीय योग शिक्षक संमेलनाचे उत्साहात आयोजन करण्यात आले. या संमेलनात जळगाव, धुळे, नंदुरबार आणि राज्यातील इतर जिल्ह्यांमधून ३०० हून अधिक योग शिक्षक व साधकांनी सहभाग नोंदवला.
कार्यक्रमाचे उद्घाटन सकाळी ९ वाजता दीपप्रज्वलनाने व मान्यवरांच्या उपस्थितीत पार पडले. व्यासपीठावर सारस्वत अतिथी म्हणून डॉ. राजेश जैन, प्रमुख अतिथी प्रसाद कुलकर्णी, संस्थापक सदस्य कृणाल महाजन, योगशिक्षक समितीचे सदस्य डॉ. देवानंद सोनार, महाराष्ट्र योगशिक्षक संघाचे विभाग प्रमुख सुनील गुरव आणि जिल्हाध्यक्ष चित्रा महाजन यांची प्रमुख उपस्थिती होती.
कार्यक्रमाची सुरुवात सामूहिक ‘ॐकार’ साधनेने करण्यात आली, ज्यामुळे वातावरणात सकारात्मकता निर्माण झाली. संमेलनाचे प्रास्ताविक कृणाल महाजन यांनी केले. त्यांनी आपल्या भाषणातून संघटनेच्या कार्याचा आढावा घेत योग शिक्षकांच्या संघटनशक्तीवर भर दिला. यानंतर प्रमुख मार्गदर्शक प्रसाद कुलकर्णी यांनी उपस्थितांना मार्गदर्शन करताना योगाचे महत्त्व, आधुनिक काळातील त्याची गरज आणि योग शिक्षकांसमोरील आव्हाने यावर प्रकाश टाकला. अध्यक्षीय समारोप करताना सुनील गुरव यांनी योग हा केवळ व्यायाम नसून ती एक जीवनशैली असल्याचे अधोरेखित केले.
हे संमेलन यशस्वी करण्यासाठी निसर्गोपचार समितीचे अध्यक्ष डॉ. सोनल महाजन, लीगल सेल सदस्य ॲड. स्वाती निकम, उपाध्यक्ष अर्चना गुरव, महासचिव पांडुरंग सोनार, कोषाध्यक्ष नूतन जोशी, सचिव पल्लवी उपासनी, सोनाली पाटील, सहसचिव कैलास पाटील, संघटन सचिव ललिता झंवर, सोशल मीडिया प्रभारी रोहन चौधरी यांच्यासह अनेक पदाधिकारी व कार्यकर्त्यांनी परिश्रम घेतले. मोठ्या संख्येने उपस्थित असलेल्या योग शिक्षकांमुळे हे संमेलन खऱ्या अर्थाने यशस्वी ठरले. सूत्र सूत्रसंचालन नीलिमा लोखंडे यांनी केले व कविता चौधरी जयश्री रोटे वैशाली चौधरी राकेश शेठ साठे कैलास पाटील, भावना चौधरी यांनी अथक परिश्रम घेतले.
