आता २५ मार्चपर्यंत सादर करता येणार नावे
जळगाव ( प्रतिनिधी ) – जळगाव शहर महानगरपालिकेतील रिक्त असलेल्या स्वीकृत सदस्य पदांच्या निवडीसाठी प्रशासकीय पातळीवर हालचालींना वेग आला आहे. मात्र, तांत्रिक कारणांमुळे आणि कागदपत्रांच्या पूर्ततेसाठी या प्रक्रियेला आता मुदतवाढ देण्यात आली आहे. आता राजकीय पक्षांना त्यांच्या प्रतिनिधींची नावे आणि प्रस्ताव सादर करण्यासाठी २५ मार्चपर्यंतची वेळ देण्यात आली आहे.
महापालिका प्रशासनाकडून मिळालेल्या माहितीनुसार, महाराष्ट्र महानगरपालिका अधिनियमातील कलम ५ नुसार रिक्त जागांवर सदस्यांचे नामनिर्देशन करण्याची प्रक्रिया सुरू आहे. यापूर्वी १७ मार्च ही नामनिर्देशन पत्रे सादर करण्याची शेवटची तारीख निश्चित करण्यात आली होती. मात्र, महापौरांनी दिलेल्या सूचनेनुसार आणि विविध पक्षांच्या गटनेत्यांना आवश्यक कागदपत्रांची जुळवाजुळव करण्यासाठी वेळ हवा असल्याने, ही मुदत वाढवून देण्यात आली आहे.
असे आहे नवीन वेळापत्रक
प्रस्ताव सादर करणे: इच्छुक सदस्यांचे प्रस्ताव आणि नामनिर्देशन पत्रे आता २५ मार्च रोजी दुपारी ४ वाजेपर्यंत सादर करता येतील.
अंतिम बैठक: सादर झालेल्या अर्जांची छाननी आणि पुढील कार्यवाहीसाठी २७ मार्च रोजी दुपारी १२ वाजता आयुक्त यांच्या दालनात (१३ वा मजला) विशेष बैठक आयोजित करण्यात आली आहे.
या संदर्भात नगरसचिव सतीश शुक्ला यांनी सभागृह नेते, भाजप, शिवसेना, शिवसेना (उबाठा) आणि राष्ट्रवादी काँग्रेस पार्टीच्या गटनेत्यांना पत्राद्वारे सूचित केले आहे. विहित मुदतीत योग्य कागदपत्रांसह नावे सादर करण्याचे आवाहन प्रशासनातर्फे करण्यात आले आहे. या प्रक्रियेकडे आता संपूर्ण शहराचे लक्ष लागून असून, कोणकोणत्या नवीन चेहऱ्यांना महापालिकेत स्वीकृत सदस्य म्हणून संधी मिळते, हे पाहणे औत्सुक्याचे ठरेल.
