श्री गजानन महाराजांची महापौर, उपमहापौरांच्या हस्ते महाआरती
जळगाव (प्रतिनिधी) : निवडून आल्यानंतर केवळ खुर्चीवर बसून राहण्यापेक्षा, प्रत्यक्ष मैदानात उतरून जनतेच्या समस्या जाणून घेणे ही माझी प्राथमिकता आहे. म्हणूनच आज मी आपल्या प्रभागात उपस्थित आहे. नगरसेवक आणि प्रशासन यांच्यात योग्य समन्वय ठेवून, निधीचा वापर करत या प्रभागाला ‘आदर्श प्रभाग’ बनवण्यासाठी आम्ही कटिबद्ध आहोत. महापालिकेची दारे नागरिकांसाठी सदैव उघडी असून तुमच्या सूचनांचे नेहमीच स्वागत असेल, असे प्रतिपादन महापौर दीपमाला काळे यांनी केले.
शहरातील छत्रपती शिवाजीनगर भागातील इंद्रप्रस्थ नगर येथे संत श्री गजानन महाराज यांच्या प्रकट दिनानिमित्त भक्तीमय वातावरणात सोहळा साजरा करण्यात आला. यावेळी जळगावचे नवनिर्वाचित महापौर दीपमाला काळे आणि उपमहापौर मनोज चौधरी यांच्या हस्ते श्रींची महाआरती आणि पालखी पूजन संपन्न झाले.
उपमहापौर मनोज चौधरी यांनीही यावेळी आपले मनोगत व्यक्त करत शहर विकासाचा संकल्प बोलून दाखवला. या सोहळ्यात योगीराज श्री गजानन महाराज बहुद्देशीय संस्थेच्या वतीने नवनिर्वाचित महापौर, उपमहापौर व मान्यवरांचा केशर बाग आणि इंद्रप्रस्थ नगर पंचक्रोशीतील नागरिकांच्या उपस्थितीत भव्य सत्कार करण्यात आला. कार्यक्रमाला प्रभाग १ च्या नगरसेविका संगीता दांडेकर, नगरसेवक ॲड. दिलीप पोकळे, जिल्हा सरकारी वकील सुरेंद्र काबरा, मनोज काळे यांची प्रमुख उपस्थिती होती. हा सोहळा यशस्वी करण्यासाठी संस्थेचे अध्यक्ष संतोष चव्हाण, उपाध्यक्ष प्रवीण पाटील, सचिव गणेश शेळके यांच्यासह योगेंद्र पवार, नरेंद्र पाटील, मनोज कपाटे, राहुल पाथरवट, राजेश पाटील, डॉ. सोपान पाटील, सतीश भोसले, वैभव जैन, हर्षा भोसले, छाया पाटील, प्रिया थोरवे, सुरेखा चव्हाण, वैशाली पाटील, राजेंद्र बडगुजर, सतीश वाणी, प्रकाश शेवाळे यांसह अनेक भाविक आणि स्वयंसेवकांनी परिश्रम घेतले.
