जळगाव महानगरपालिका निवडणूक
जैन इरिगेशन सिस्टीम्स लिमिटेडचे अध्यक्ष अशोक जैन व सौ. ज्योती जैन यांनी बजावला मतदानाचा हक्क
जळगाव | प्रतिनिधी : राज्यातील २९ महानगरपालिकांच्या सार्वत्रिक निवडणुकांसाठी आज बुधवार, १५ जानेवारी रोजी सकाळी ७.३० वाजल्यापासून मतदानास सुरुवात झाली असून सायंकाळी ५.३० वाजेपर्यंत मतदारांना आपला हक्क बजावता येणार आहे. या निवडणुकांचा निकाल उद्या, शुक्रवार १६ जानेवारी रोजी जाहीर केला जाणार आहे.
दरम्यान, जळगाव शहरातही मतदान प्रक्रियेला शांततेत सुरुवात झाली असून विविध क्षेत्रांतील मान्यवरांनी सकाळीच मतदान करून नागरिकांना लोकशाही प्रक्रियेत सहभागी होण्याचा संदेश दिला आहे. याच पार्श्वभूमीवर जैन इरिगेशन सिस्टीम्स लिमिटेडचे अध्यक्ष अशोक जैन व सौ. ज्योती जैन यांनी शहरातील मतदान केंद्रावर जाऊन आपले मतदानाचे कर्तव्य बजावले.
मतदानानंतर त्यांनी लोकशाहीच्या या महत्त्वाच्या प्रक्रियेत सर्व नागरिकांनी उत्स्फूर्त सहभाग घ्यावा, असे आवाहन केले. शहरात सकाळपासूनच मतदारांची ये-जा सुरू असून, पुढील सत्रात मतदानाचा टक्का वाढण्याची अपेक्षा प्रशासनाकडून व्यक्त करण्यात येत आहे.
