जळगाव शहरातील इच्छादेवी चौकातील घटना
जळगाव (प्रतिनिधी) :- किराणा साहित्य घेऊन घरी परतत असलेल्या महीलेला भरधाव ट्रकने धडक दिल्यामुळे या महिलेच्या दोन्ही पायांचा चुराडा होऊन ते निकामी झाले आहेत. या महिलेवर अतिदक्षता विभागात उपचार सुरू आहे. हा अपघात रविवारी दि. २० रोजी दुपारी इच्छादेवी चौकात झाला. चालक व ट्रक एमआयडीसी पोलिसांनी ताब्यात घेतला आहे.
ललिता प्रकाश सोनवणे (४७, रा. तांबापुरा परिसर) असे जखमी महिलेचे नाव आहे. पती अपंग व सासू आजारी असल्याने या दोघांचा आधार असलेल्या ललिता सोनवणे या एका सुपर शॉपमध्ये कामाला आहे. त्यातून मिळणाऱ्या उत्पन्नावरच या कुटुंबाचा उदरनिर्वाह चालतो.(केसीएन)रविवारी ललिता या किराणा साहित्य घेऊन घरी परतत असताना आकाशवाणी चौकाकडून अजिंठा चौफुलीकडे जाणाऱ्या भरधाव ट्रकने इच्छादेवी चौकातील सर्कलजवळ त्यांना जोरदार धडक दिली.
यात ट्रकच्या पुढील चाकाखाली महिलेचे दोन्ही पाय आल्याने त्यांचा अक्षरशः चुराडा होऊन ते निकामी झाले आहेत. अपघात झाल्यानंतर महिलेचे नातेवाईक विवेकानंद बागुल व अन्य नागरिकांनी जखमी अवस्थेत महिलेला शासकीय वैद्यकीय महाविद्यालय व रुग्णालयात दाखल केले. महिलेच्या पायांची स्थिती पाहता, तिला खासगी रुग्णालयात हलविण्याचा सल्ला देण्यात आला. मात्र, घरची आर्थिक स्थिती बिकट असल्याने लाखोंचा खर्च करणे शक्य नसल्याने या महिलेवर ‘जीएमसी तीलच आयसीयूमध्ये उपचार सुरू आहेत.
