आयोजक ग्रामविकास मंत्र्यांनी हसून टाळला विषय, कार्यकर्त्यांमधून संताप व्यक्त
जळगाव (प्रतिनिधी) : तालुक्यात आज रविवारी दि. २५ रोजी मोठ्या थाटात लखपती दीदी कार्यक्रमाचे आयोजन करण्यात आले होते. त्यासाठी पंतप्रधान नरेंद्र मोदींसोबत केंद्रीय कृषिमंत्री शिवराजसिंह चौहान तसेच महाराष्ट्राचे मुख्यमंत्री एकनाथ शिंदे, दोन्ही उपमुख्यमंत्री आणि इतरही अनेक मंत्री व मान्यवरांची उपस्थिती लाभली होती. मात्र या भव्यदिव्य कार्यक्रमात सरकारी निष्काळजीपणा उघड झाला आहे. विधानपरिषदेचे आमदार एकनाथराव खडसे यांना निमंत्रणच पाठविले गेले नसल्याचे खुद्द आ. खडसेंनी सांगितल्यामुळे “प्रोटोकॉल” भंग झाल्याचे दिसून आले. तर याबाबत आयोजक असलेले ग्रामविकास मंत्री गिरीश महाजन यांना विचारले असता त्यांनी हसून विषय टाळला. यामुळे खडसेंच्या कार्यकर्त्यांनी संताप व्यक्त केला आहे.
जळगावमधील कार्यक्रमात केंद्र सरकारच्या लखपती दीदी योजनेंतर्गत ११ लाख लखपती दीदींना प्रमाणपत्रे वाटप केली जाणार होती. याशिवाय बचत गटांसोबत काम करणाऱ्या महिलांना लाभ देण्यासाठी २५०० कोटी रुपयांचा निधी वितरीत केला जाणार होता. लोकसभा निवडणुकीनंतर पंतप्रधान नरेंद्र मोदी यांचा हा दुसरा महत्त्वाचा दौरा मानला जात होता. या कार्यक्रमासाठी राज्यभरातील महायुतीचे सर्व मंत्री उपस्थित राहिले. मात्र ज्येष्ठ नेते व माजी मंत्री आ. एकनाथ खडसेंची अनुपस्थिती तिथे जाणवली.
दरम्यान, शासकीय कार्यक्रम असल्याने जिल्ह्यातील सर्व आमदारांना रितसर निमंत्रण देणे बंधनकारक होते. जिल्हाधिकारी कार्यालयाकडूनदेखील आ. खडसेंना कुठलेही पत्र नाही. मला या कार्यक्रमाचे निमंत्रणच मिळाले नाही. वेळेत निमंत्रण मिळाले असते तरी मी कार्यक्रमाला गेलो असतो. आता निमंत्रण मिळाले तरी जाणार नाही, असे एकनाथ खडसे यांनी प्रतिक्रिया दिली आहे. लखपती दीदी हा शासनाचा कार्यक्रम होता, मी शासनाचा एक प्रतिनिधी आहे . तरीही मला लखपती दीदी या कार्यक्रमाचे निमंत्रण मिळालेले नाही. मी या कार्यक्रमासंदर्भात परवा जिल्हाधिकारी यांच्याशी बोललो होतो. ते बोलले होते निमंत्रण येईल पण सदर कार्यक्रमाचे निमंत्रण आतापर्यंत आलेच नाही.
सदर या कार्यक्रमाची जबाबदारी जिल्हाधिकारी यांची होती. जाणीवपूर्वक मला डावलले गेले असले पाहिजे अशी खंत आ. एकनाथराव खडसे यांनी “केसरीराज”शी बोलतांना व्यक्त केली. याबाबत ग्रामविकास मंत्री गिरीश महाजन यांना माध्यमांनी विचारले असता, त्यांनी हसून विषय टाळत, हात जोडून, चला धन्यवाद असे म्हणून निघून गेले. ग्रामविकास मंत्र्यांच्या या कृतीबद्दल खडसे यांच्या कार्यकर्त्यांमध्ये संताप व्यक्त होत आहे. तर आ. एकनाथ खडसेंना डावलण्यामागे नेमके कारण काय हे आता गुलदस्त्यात आहे.
