लाचलुचपत प्रतिबंधक विभागाची धडक कारवाई
जळगाव (प्रतिनिधी):- शेतजमिनीची खरेदी नोंद लावण्यासाठी ५,००० रुपयांच्या लाचेची मागणी केल्याप्रकरणी जळगाव तालुक्यातील सजा करंज येथील तलाठ्याविरुद्ध जळगाव तालुका पोलीस स्टेशनमध्ये गुन्हा दाखल करण्यात आला आहे. अजय बिडवे असे गुन्हा दाखल झालेल्या लोकसेवकाचे नाव आहे.
या प्रकरणातील तक्रारदाराने आपल्या पत्नीच्या नावे संबंधित तलाठ्याच्या कार्यक्षेत्रात शेतजमीन खरेदी केली होती. या खरेदी केलेल्या क्षेत्रावर सरकारी दप्तरी नोंद करण्यासाठी तलाठी अजय बिडवे यांनी ५,००० रुपयांच्या लाचेची मागणी केली होती. याप्रकरणी तक्रारदाराने २७ फेब्रुवारी २०२६ रोजी लाचलुचपत प्रतिबंधक विभाग (ACB), जळगाव यांच्याकडे तक्रार नोंदवली होती.
तक्रारीची शहानिशा करण्यासाठी २७ फेब्रुवारी रोजी पंचांसमक्ष पडताळणी करण्यात आली. यावेळी तलाठी बिडवे यांनी लाचेची मागणी केल्याचे निष्पन्न झाले. मात्र, तक्रारदार जेव्हा लाचेची रक्कम देण्यासाठी गेले, तेव्हा संशय आल्याने लोकसेवकाने ती रक्कम स्वीकारली नाही. लाचेची रक्कम स्वीकारली नसली तरी, लाचेची मागणी केल्याचे सिद्ध झाल्याने त्यांच्याविरुद्ध भ्रष्टाचार प्रतिबंध अधिनियम १९८८ च्या कलम ७ नुसार गुन्हा नोंदवण्यात आला आहे.
ही कारवाई लाचलुचपत प्रतिबंधक विभाग, नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक माधव रेड्डी आणि सुनील दोरगे यांच्या मार्गदर्शनाखाली करण्यात आली. जळगाव एसीबीचे पोलीस उपअधीक्षक योगेश ठाकूर यांनी या कारवाईचे पर्यवेक्षण केले असून, पोलीस निरीक्षक स्मिता नवघरे यांनी सापळा अधिकारी म्हणून काम पाहिले. या पथकात पोलीस निरीक्षक हेमंत नागरे, दिनेशसिंग पाटील, संगिता पवार, बाळू मराठे, अमोल सूर्यवंशी आणि प्रणेश ठाकूर यांचा समावेश होता.
कोणत्याही लोकसेवकाने कामासाठी लाचेची मागणी केल्यास नागरिकांनी लाचलुचपत प्रतिबंधक विभागाच्या १०६४ या टोल-फ्री क्रमांकावर किंवा ०२५७-२२३५४७७ या क्रमांकावर संपर्क साधावा, असे आवाहन करण्यात आले आहे.
