भटक्या कुत्र्यांचा उपद्रव सुरूच
जळगाव (प्रतिनिधी) – शहरातील कानळदा रस्त्यावर जात असलेल्या रिक्षा चालकाच्या पुढे अचानक कुत्रा आडवा आल्याने त्याने जोरात ब्रेक दाबला. परिणामी रीक्षा रस्त्याच्या बाजूला उलटी झाली. यात रिक्षा चालक जखमी झाला आहे. दरम्यान भटक्या कुत्र्यांच्या उपद्रवांमुळे जळगाव शहरवासीय त्रस्त झाले आहेत.
शहरातील सत्यम पार्क परिसरातील सचिन जयस्वाल हे रिक्षा चालवून आपल्या परिवाराचा उदरनिर्वाह करतात. दि. २५ रोजी दुपारी ३.३० वाजेच्या सुमारास घरी जेवणासाठी जात असतांना नवीन कानळदा रोड परिसरातील लक्ष्मी नगराच्या पुढे जात असतांना अचानक दोन ते तीन कुत्रे मध्ये आले. त्या कुत्र्यांना वाचविण्यासाठी त्यांनी प्रयत्न केला असता त्याचा रिक्षावरील ताबा सुटल्याने रिक्षा पलटी झाली.
घटनास्थळी ५ ते १० मिनिटे कुणालाही लक्षात आले नाही. पण काहीना समजताच रस्त्यावर येणाऱ्या जाणाऱ्यानी त्यांना लागलीच रिक्षा उचलत बाहेर काढले. त्यांना किरकोळ दुखापत झाली आहे. सुदैवाने रिक्षात कुठलेही प्रवाशी नव्हते. रिक्षाचालक सचिन जैस्वाल यांना किरकोळ दुखापत झाली आहे. रिक्षा चालकाला उपचारासाठी रुग्णालयात नागरिकांनी पाठविले.
दरम्यान भटक्या कुत्र्यांच्या उपग्रहामुळे जळगाव शहरवासीय त्रस्त झाले आहेत. महानगरपालिकेने याबाबत तातडीने उपाययोजना कराव्यात. आयुक्तांनी या प्रश्नाकडे गंभीर त्यांनी लक्ष द्यावे, अशी मागणी नागरिकांकडून करण्यात आली आहे.
