जळगाव तालुक्यात कुसुंबा येथील घटना
जळगाव (प्रतिनिधी) : तालुक्यातील कुसुंबा येथे एका तरुणाने बुधवारदि. १५ ऑक्टोबर रोजी रात्री १० वाजण्याच्या सुमारास घरामागील निंबाच्या झाडाला गळफास घेऊन आत्महत्या केली. एमआयडीसी पोलीस स्टेशनला अकस्मात मृत्यूची नोंद करण्यात आली आहे.
प्रकाश एकनाथ गायकवाड (वय ४२) असे मयत तरुणाचे नाव आहे. प्रकाश गायकवाड हे एमआयडीसी परिसरातील एका कंपनीत कामाला होते. घटनेच्या रात्री त्यांनी रात्री ८ वाजता जेवण केले आणि त्यानंतर ते आपल्या खोलीत झोपण्यासाठी गेले. रात्री १० वाजता त्यांचा मोठा मुलगा राहुल वडिलांच्या खोलीत गेला असता, त्यांना वडील तिथे दिसले नाहीत. त्याने घराच्या मागे पाहिले असता, त्याचे वडील प्रकाश गायकवाड हे निंबाच्या झाडाला गळफास घेतलेल्या अवस्थेत आढळून आले. मुलाने हंबरडा फोडल्यावर ग्रामस्थांनी धाव घेतली.
ग्रामस्थांनी तातडीने प्रकाश गायकवाड यांना शासकीय वैद्यकीय महाविद्यालयात दाखल केले. मात्र, तेथे उपस्थित डॉक्टरांनी त्यांना तपासून मृत घोषित केले. घटनेच्या वेळी प्रकाश गायकवाड यांच्या पत्नी छाया गायकवाड या माहेरी गेल्या होत्या, तर त्यांचा लहान मुलगा कामासाठी हॉटेलवर गेला होता. घरात फक्त प्रकाश गायकवाड आणि त्यांचा मोठा मुलगा राहुल हेच उपस्थित होते. प्रकाश गायकवाड यांनी नेमकी कोणत्या कारणातून हे टोकाचे पाऊल उचलले, याचे कारण अद्याप अस्पष्ट आहे. या घटनेची नोंद एमआयडीसी पोलीस ठाण्यात करण्यात आली असून, पोलीस पुढील तपास करत आहेत.
