चाळीसगाव तालुक्यात कोंगानगर येथील घटना
चाळीसगाव (प्रतिनिधी) :- चाळीसगाव तालुक्यातील कोंगानगर येथे रविवारी दि. १५ जून रोजी दुपारी शेतात काम करीत असताना वीज कोसळून तिघांचा मृत्यू झाला असून, तरुण जखमी झाला आहे. रुग्णालयात आ. मंगेश चव्हाण यांच्यासह तहसीलदार व अधिकाऱ्यांनी भेट देऊन माहिती जाणून घेतली आहे.
शहरासह जिल्ह्यात शेतीकामांना शेतकऱ्यांनी वेग दिला आहे. कृषी विभागाकडून १५ जूननंतर पेरणी करण्याचे आवाहन करण्यात आले आहे. चाळीसगाव तालुक्यात रविवारी १५ जून रोजी दुपारी विजांचा कडकटाट व मेघगर्जनेसह वादळी पावसाला सुरुवात झाली.(केसीएन)तालुक्यातील कन्नड (जि. छत्रपती संभाजीनगर) तालुक्यालगतच्या कोंगानगर शेतशिवारात शेतीकामे करीत असताना मजुरांवर अचानक वीज कोसळली. यात लखन दिलीप पवार (वय १४), दशरथ उदल पवार (वय २४, दोन्ही रा. कोंगानगर) यांच्यासह समाधान प्रकाश राठोड (वय ९, रा. जेहूर, ता. कन्नड, जि. छत्रपती संभाजीनगर) या बालकाचाही मृत्यू झाला.
तर या दुर्घटनेत दिलीप उदल पवार (वय ३५) जखमी झाले असून, त्यांच्यावर चाळीसगाव येथील शासकीय रुग्णालयात उपचार सुरू आहेत. या दुर्दैवी घटनेची माहिती मिळताच चाळीसगाव येथील आ. मंगेश चव्हाण, उपविभागीय अधिकारी, तहसीलदार, नायब तहसीलदार (महसूल), मंडळ अधिकारी व तलाठी यांनी शासकीय रुग्णालयात भेट देऊन मृतांच्या नातेवाइकांना धीर दिला. पुढील मदतकार्यासाठी महसूल प्रशासनाकडून आवश्यक कार्यवाही सुरू करण्यात आली असल्याची माहिती तहसीलदार प्रशांत पाटील यांनी दिली.
