धरणगाव तालुक्यातील हनुमंतखेडे येथील घटना
धरणगाव (प्रतिनिधी) :- हनुमंतखेडे येथे किरकोळ कारणावरून वृध्द महिलेच्या डोक्यात लोखंडी कोयता मारून दुखापत केल्याची घटना घडली आहे. याप्रकरणी बुधवारी २५ ऑक्टोबर रोजी दुपारी २ वाजता धरणगाव पोलीस ठाण्यात एकाविरोधात गुन्हा दाखल करण्यात आला आहे.
शांताबाई मंगल पवार (वय-६०, रा. हनुमंतखेडा ता.धरणगाव) या वृध्द महिला आपल्या परिवारासह वास्तव्याला आहे. १७ ऑक्टोबर रोजी सायंकाळी ७ वाजेच्या सुमारास गावात राहणारा सुकदेव गोपाल सोनवणे हा तिथे आला. माझी पत्नी तुमच्या घरात आहे का असे त्याने शांताबाई यांना विचारले. त्यावरून शांताबाईने महिलेने माझ्या घरात नसल्याचे सांगितले. याचा राग आल्याने सुकदेव सोनवणे याने लोखंडी कोयता वृध्द महिलेच्या डोक्यात मारून दुखापत केली.
त्यांना तातडीने धरणगाव ग्रामीण रूग्णालयात उपचारासाठी दाखल करण्यात आले. उपचार घेतल्यानंतर वृध्द महिलेने धरणगाव पोलीस ठाण्यात फिर्याद दिली. त्यानुसार बुधवारी २५ ऑक्टोबर रोजी दुपारी २ वाजता सुकदेव सोनवणे याच्याविरोधात धरणगाव पोलीस ठाण्यात गुन्हा दाखल करण्यात आला आहे. पुढील तपास पोहेकॉ राजेंद्र कोळी करीत आहे.
