पाचोरा बसस्थानक परिसरात घडले गुन्हे, पोलिसांची कारवाई
जळगांव (प्रतिनिधी) : पाचोरा बसस्थानक परिसरात गर्दीचा फायदा घेत प्रवाशांचे खिसे कापणाऱ्या महिलांचा टोळीला जेरबंद करण्यात पाचोरा गुन्हे शोध पथकाला मोठे यश आले आहे. पोलिसांनी केलेल्या कारवाईत ३ महिलांना ताब्यात घेवून, त्यांच्याकडून ३२ हजार ४०० रुपयांचा मुद्देमाल हस्तगत केला आहे.
वडगांव खुर्द येथील ७० वर्षीय ज्येष्ठ नागरिक श्रावण ताराचंद पाटील हे नोव्हेंबरमध्ये पाचोरा बसस्थानकावर बसमध्ये चढत असताना अज्ञात चोरट्याने त्यांच्या खिशातून १३ हजार ४०० रुपये चोरीस गेले होते. याबाबत पाचोरा पोलीस ठाण्यात गुन्हा दाखल करण्यात आला होता. दि. २३ फेब्रुवारी रोजी पाचोरा पोलीस स्टेशनच्या गुन्हे प्रकटीकरण शाखेचे कर्मचारी राहुल शिंपी, शरद पाटील आणि श्रीराम शिंपी यांना गुप्त बातमीदारामार्फत माहिती मिळाली की, बसस्थानक परिसरात संशयीत ३ महिला फिरत असल्याबाबत माहिती मिळाली, तात्काळ पथकाने सापळा रचून तिन्ही महिलांना ताब्यात घेतले.
पोलीस निरीक्षक राहुलकुमार पवार यांनी त्यांची चौकशी केली असता, या महिलांनी गुन्ह्याची कबुली दिली. अटक करण्यात आलेल्या संशयित महिलांमध्ये
निर्मला सुनील जोशी (वय ३३, रा. गंगापुरी, जामनेर), सोनाली गणेश विधाते (वय २४, रा. हिसोडा खुर्द, जालना, हल्ली मुक्काम कुंभारी, जामनेर), उषाबाई तेजराव (वय ५५, रा. कुंभारी, जामनेर) यांची महिला पोलीस अंमलदारांच्या उपस्थितीत घेतलेल्या अंगझडतीत ३२ हजार ४००० रुपये रोख मिळून आले. पोलिसांनी पंचनामा करून सदरची रक्कम ही जप्त केली आहे.
गुन्ह्याचा पुढील तपास पोलीस हेडकॉन्स्टेबल राहुल शिंपी करत आहेत. सदरची कारवाई पोलीस अधीक्षक महेश्वर रेड्डी, अप्पर पोलीस अधीक्षक कविता नेरकर, उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार तसेच पोलीस कर्मचारी राहुल शिंपी, अशोक हटकर, शरद पाटील, श्रीराम शिंपी, प्रियंका आहेर तसेच होमगार्ड सोनाली शशीकांत पाटील,कल्पना तानाजी निंबाळकर,संगीता मुरलीधर पाटील यांनी पार पाडली आहे.
