पॉक्सोच्या दाखल गुन्ह्यात अटक कधी होणार ?
जळगाव (प्रतिनिधी) – महिला व बालविकास विभाग यांच्याकडे अत्यंत गंभीर स्वरुपाची तक्रार दि. २९ रोजी सादर करण्यात आली होती. बाल कल्याण समिती, जळगांवच्या अध्यक्ष व सदस्यांवर पॉक्सो कायद्यांतर्गत गुन्हा दाखल आहे. तरीही त्यांना अटक व निलंबन झालेले नाही. त्यांना जिल्ह्यातील तिघी मंत्र्यांसह जिल्हाधिकाऱ्यांनी अभय दिले आहे काय असा प्रश्न निर्माण झाला होता. अखेर प्रजासत्ताक दिनी शासनाला जाग आली असून या बालकल्याण समितीची नियुक्ती समाप्त करण्यात आली आहे. आता त्यांना चौकशी होऊन अटक होण्याची अपेक्षा व्यक्त केली जात आहे.
बाल कल्याण समितीतील तीन पदाधिकाऱ्यांवर गुन्हा दाखल होऊन सदर सदस्यांची राज्य चौकशी समितीद्वारे ऑगस्ट – २०२३ महिन्यातच चौकशी पुर्ण झालेली आहे. खडके बालगृहाची अत्याचार प्रकरणी एरंडोल पोलीस स्टेशन येथे दिनांक २६.०७.२०२३ रोजी गुन्हा दाखल झालेला आहे. खडके बालगृह अत्याचार प्रकरणाची माहिती पिडितांनी अध्यक्ष व दोन सदस्य बाल कल्याण समिती, जळगाव यांना सर्वप्रथम दिली होती. एरंडोल पोलीस स्टेशन येथे गुन्हा दाखल होण्याच्या ६ महिने अगोदर या संपूर्ण प्रकरणाची माहिती पिडितांनी बाल कल्याण समिती अध्यक्ष व सदस्य अध्यक्ष देवयानी गोविंदवार, सदस्य विद्या बोरनारे, सदस्य संदिप पाटील यांना घटनाक्रम माहिती होता.
सदर व्यक्तींवर दाखल गुन्ह्याचा तपशील – भा. द. वि. कलम ३२४,३५४,३७६(२)(n)(क),३२३,५०६, पोस्को कायदा २०१२ अंतर्गत ४,५(फ) (एल) (ओ) ,६,८,९(फ)(एल)(ओ) ,१९,२१,८२ प्रमाणे गुन्हा दाखल आहे. जळगाव जिल्ह्यातील खडके, ता. एरंडोल येथे संस्थेच्या माध्यमातून खाजगी रित्या चालवल्या जाणाऱ्या कै. य. ब. पाटील, मुलींचे बालगृह, खडके येथील मुलींच्या बालगृहात लैंगिक शोषणाची गंभीर स्वरुपाची घटनेची तक्रार बाल कल्याण समिती, जळगाव येथील तीन अध्यक्ष /सदस्य, अध्यक्ष श्रीमती देवयानी गोविंदवार, सदस्य श्रीमती विद्या बोरनारे व सदस्य श्री. संदीप पाटील यांना पिडीत बालिकांनी ऑगस्ट २०२२ मध्ये सर्व प्रथम सांगितली होती.
पोक्सो अतंर्गत सर्व प्रथम गुन्ह्याची माहिती असतांना देखील त्याचवेळी गुन्हा दाखल न करता आरोपीची पाठराखण करत सदर बाब अनेक दिवस दाबुन ठेवणाऱ्या महाशय असणारे बाल कल्याण समिती अध्यक्ष – देवयानी गोविंदवार, सदस्य विद्या बोरणार, सदस्य – संदिप पाटील या तिनही महाशयांचे तात्काळ निलबंन करण्यात यावे. बाल कल्याण समितीतील अध्यक्ष, सदस्य ही समिती तात्काळ बरखास्त करण्यात यावी. या तीन महाशयांना या पुढे शासनस्तरावर कोणत्याही शासकीय समितीच्या सदस्य पदी नियुक्ती करण्यात येवु नये. या तीन महाशयांना बालकल्याण समिती येथे येण्यास प्रतिबंध करण्यात यावा.
सदर तक्रारीची गांभिर्याने दखल घेण्याची विनंती महाराष्ट्र स्टुडंट्स युनियनच्या वतिने करण्यात आली होती. प्रशासनाने अद्याप ही तक्रारीची दखल घेतलेली नसल्या कारणाने दि. १९ पासुन बेमुदत साखळी उपोषण सुरु करण्यात आले होते. आता जिल्हा महिला व बालविकास अधिकारी वनिता सोनगत यांनी युनियनच्या दीपक सपकाळे यांना पत्राद्वारे सदर बालकल्याण समिती बरखास्त केल्याची माहिती दिली आहे. त्यासाठीचे उपोषण सोडावे अशी विनंती केली आहे.