एरंडोल तालुक्यातील कासोदा येथील घटना
एरंडोल (प्रतिनिधी) : एरंडोलकडून भरधाव वेगात येणाऱ्या दुधाच्या टँकरने तालुक्यातील कासोदा येथे एका पायी चालणाऱ्या इसमाला जबर धडक दिली. या अपघातातील जखमी इसमाचा उपचारादरम्यान मृत्यू झाल्याची घटना ८ रोजी रात्री घडली. याप्रकरणी कासोदा पोलीस स्टेशनला अकस्मात मृत्यूची नोंद करण्यात आली आहे.
योगेश चंद्रकांत देशमुख (४८, रा. कासोदा ता. एरंडोल) असे मृत इसमाचे नाव आहे. त्यांच्या पश्चात आई, वडील, पत्नी, तीन मुलं असा परिवार आहे. योगेश देशमुख हा दोन बहिणींचा एकुलता एक भाऊ होता.(केसीएन)भावे नगरमधील रहिवासी योगेश चंद्रकांत देशमुख (४८) हे दररोज रात्री जेवणानंतर शतपावलीसाठी रस्त्याच्या कडेवर चालत असे. दरम्यान, ८ रोजी रात्री जेवणानंतर फिरायला गेले असता एरंडोलकडून भरधाव वेगात येत असलेल्या एम.एच. १७ बी.डी. ७७२२ या क्रमांकाच्या दुधाच्या टँकरने त्यांना जबर धडक दिली.
या अपघातात योगेश चंद्रकांत देशमुख (वय ४८) यांच्या डाव्या पायावरुन टँकरचे चाक गेल्याने गंभीर दुखापत झाली. त्यात योगेश देशमुख हे गंभीर जखमी झाल्याने त्यांना जळगाव येथे खाजगी दवाखान्यात दाखल करण्यात आले. उपचार सुरु असताना त्यांचा मृत्यू झाला. दरम्यान, अपघातानंतर टँकर चालक घटना स्थळावरून टँकरसह कासोदा पोलीस ठाण्यात हजर झाला. योगेश हे मनमिळाऊ स्वभावाचे होते. अंत्ययात्रेत पाळधी येथील जिल्हा परिषदचे माजी सदस्य प्रतापराव पाटील यांच्यासह पंचक्रोशीतील असंख्य नागरिक उपस्थित होते. याप्रकरणी कासोदा पोलीस स्टेशनला अकस्मात मृत्यूची नोंद करण्यात आली आहे.
