जळगाव तालुक्यातील दापोरा येथील घटना
जळगाव (प्रतिनिधी) : तालुक्यातील दापोरा येथे एका शेतकऱ्याने कर्जबाजारीपणामुळे आत्महत्या केल्याची धक्कादायक घटना मंगळवार दि. ६ ऑगस्ट रोजी दुपारी १२ वाजेच्या सुमारास उघडकीस आली आहे. या प्रकरणी जळगाव तालुका पोलीस स्टेशनला अकस्मात मृत्यूची नोंद करण्यात आली आहे.
दशरथ भीमराव तांदळे (वय ५४, रा. दापोरा ता. जळगाव) असे मयत इसमाचे नाव आहे. ते गावात पत्नी, एक मुलगा, एक मुलगी यांच्यासह राहत होता. शेती काम करून तो परिवाराचा उदरनिर्वाह करीत होता. दरम्यान त्याच्यावर शेतीसाठी काढलेले कर्ज आणि हात उसनवारी असून हे कसे फेडावे या विवंचनेत दशरथ तांदळे होते. (केसीएन) यातूनच नैराश्यात गेल्यामुळे त्याने राहत्या घरी छताला गळफास लावून घेत आत्महत्या केली.
कुटुंबियांना समजतात त्यांनी तातडीने शासकीय वैद्यकीय महाविद्यालय व रुग्णालय जळगाव या ठिकाणी दाखल केले असता वैद्यकीय अधिकारी डॉ. रेणुका भंगाळे यांनी त्यांना मयत घोषित केले. यावेळी कुटुंबीयांनी मन हेलावणारा आक्रोश केला. जळगाव तालुका पोलीस स्टेशनला घटनेची माहिती मिळताच त्यांनी घटनास्थळी जाऊन पाहणी केली. तालुका पोलीस स्टेशनला अकस्मात मृत्यूची नोंद करण्यात आले आहे.
