अमळनेर तालुक्यातील जानवे आरोग्य केंद्राचा समावेश
जळगाव ( प्रतिनिधी ) – राष्ट्रीय गुणवत्ता आश्वासन मानक (NQAS – National Quality Assurance Standards) अंतर्गत राज्यस्तरीय मूल्यमापनात जिल्ह्यातील प्राथमिक आरोग्य केंद्रांनी उल्लेखनीय कामगिरी करत गुणवत्ता निकष पूर्ण केले आहेत. त्यात जळगाव जिल्ह्यातील अमळनेर तालुक्यातील जानवे प्राथमिक आरोग्य केंद्राचा समावेश झाला आहे.
राज्यातील सार्वजनिक आरोग्य सुविधा यांच्या NQAS राज्यस्तरीय मूल्यमापनाअंतर्गत एकूण ७१ आरोग्य संस्थांचे मूल्यमापन करण्यात आले. या मूल्यमापनामध्ये जिल्ह्यातील काही प्राथमिक आरोग्य केंद्रांनी आवश्यक गुणवत्ता निकष पूर्ण करून राज्यस्तरीय NQAS प्रमाणनासाठी पात्रता प्राप्त केली आहे.
जळगाव जिल्ह्यातील अमळनेर तालुक्यातील जानवे प्राथमिक आरोग्य केंद्राने 87.98% गुण प्राप्त करून उत्तम कामगिरी केली आहे. तसेच नंदुरबार जिल्ह्यातील नवापूर तालुक्यातील धुलीपाडा (75.29%) व तळोदा तालुक्यातील सोंरवल बी.के. (75.63%) या प्राथमिक आरोग्य केंद्रांनी देखील गुणवत्ता निकष पूर्ण करत पात्रता मिळवली आहे.
आरोग्य केंद्रांचे बळकटीकरन आणि आश्वासक आरोग्य सेवा पुरविण्यासाठी जिल्हा परिषदेच्या मुख्य कार्यकारी अधिकारी मिनल करनवाल यांनी विशेष लक्ष केंद्रित केल्याने या आरोग्य केंद्राने ओपीडी, प्रयोगशाळा, प्रसूती कक्ष, रुग्णसेवा, संसर्ग नियंत्रण, गुणवत्ता व्यवस्थापन, रुग्ण समाधान अशा विविध विभागांमध्ये अपेक्षित किमान गुण प्राप्त केले आहेत. विशेषतः सेवा पुरवठा, रुग्ण हक्क, क्लिनिकल सेवा, संसर्ग नियंत्रण व गुणवत्ता व्यवस्थापन या क्षेत्रांमध्ये समाधानकारक कामगिरी नोंदवण्यात आली आहे.
राज्यस्तरीय प्रमाणन मिळवलेल्या आरोग्य संस्थांनी आता राष्ट्रीय स्तरावरील NQAS प्रमाणनासाठी ‘साक्षम (SaQsham) पोर्टलवर अर्ज करणे आवश्यक आहे. अन्यथा सहा महिन्यानंतर राज्यस्तरीय प्रमाणन अवैध ठरेल, असे निर्देश आरोग्य विभागाकडून देण्यात आले आहेत.
जिल्हा आरोग्य यंत्रणेला ही मोठी उपलब्धी असून भविष्यात सर्व आरोग्य संस्थांनी गुणवत्ता सुधारणा कायम ठेवून डिसेंबर 2026 पर्यंत 100% NQAS प्रमाणनाचे उद्दिष्ट साध्य करावे, असे आवाहन करण्यात आले आहे.
ही यशस्वी कामगिरी जिल्हा आरोग्य अधिकारी, वैद्यकीय अधिकारी व सर्व आरोग्य कर्मचाऱ्यांच्या समन्वयातून साध्य झाली असून त्यांच्या प्रयत्नांचे सर्वत्र कौतुक होत आहे.
