जळगाव (प्रतिनिधी) – कोरोना महामारीचे थैमान सुरूच असून जिल्ह्यात शुक्रवारी सकाळी आणखी एका कोरोनाबाधित पुरूषाचा मृत्यू झाला आहे. दरम्यान तिसर्‍या लाटेतील कोविड बाधित मृत्यू झालेल्यांची संख्या आता तीन झाली आहे.
शासकीय वैद्यकीय महाविद्यालय व रुग्णालय येथे भुसावळ येथील सदाशिव पाटील नगरातील एका ५३ वर्षीय इसमावर उपचार करण्यासाठी गुरुवारी रात्री दाखल करण्यात आले होते. मात्र त्याला मधुमेह तसेच हृदयाशी संबंधित आजार असल्याने व कोरोना अधिक पसरल्याने काही वेळानंतर त्याचा मृत्यू झाला आहे.
जिल्ह्यात आता ३ हजार ३४ रुग्ण ऍक्टिव्ह असून कोरोना प्रतिबंधक नियमांचे पालन करण्याचे आवाहन जिल्हा प्रशासनातर्फे करण्यात आले आहे. शासकीय वैद्यकीय महाविद्यालय व रुग्णालयात आतापर्यंत दोन मृत्यू झाले आहेत. यापूर्वी ४२ वर्षीय पुरुष व आता ५३ वर्षीय पुरुष मृत्युमुखी पडले आहेत. तिसऱ्या लाटेतील हा आजचा तिसरा मृत्यू आहे.
