भुसावळ (प्रतिनिधी) – शहरातील खडका चौफुली येथे आज सकाळी लग्नासाठी आलेल्या बुलढाण्यातील दाम्पत्याच्या दुचाकीला डंपरने कट मारल्याने डंपरचे चाक डोक्यावरून गेल्याने अपघातात चंद्रकांत जगन्नाथ वराडे (63) व संध्या चंद्रकांत वराडे (56) या दाम्पत्याचा जागीच मृत्यू झाला आहे.
याबाबत मिळालेली माहिती अशी बुलढाण्यातील वराडे दाम्पत्य भुसावळातील गडकरी नगरात नातेवाईकांकडील लग्न समारंभासाठी आले होते. गुरुवारी भुसावळातील देना नगरातील नातेवाईकांकडे मुक्काम केल्यानंतर दाम्पत्य दुचाकी (एम.एच.28 ए.एल.6671) ने खडका रोडने गडकरी नगराकडे येण्यासाठी निघाले असता खडका चौफुलीवर एका डंपरने कट मारून दुचाकी घसरली व दाम्पत्यही रस्त्यावर फेकले गेल्यानंतर दाम्पत्याच्या डोक्यावरून डंपरचे चाक गेल्याने दोघांचा जागीच मृत्यू झाला. अपघाताची माहिती कळताच पोलिस उपअधीक सोमनाथ वाघचौरे, पोलिस निरीक्षक दिलीप भागवत व सहकार्यांनी घटनास्थही धाव घेतली. अपघाताची माहिती मिळताच परिसरातील नागरिकांनी घटनास्थळी धाव घेतली. काही काळ घटनास्थळी वाहतुकीचा खोळंबा झाला होता. मृतदेह शवविच्छेदनासाठी वरणगाव ग्रामीण रुग्णालयात हलवण्यात आले.
