संशयित शिरसोलीचे रहिवासी, जळगाव शहर पोलीस स्टेशनची कामगिरी
जळगाव (प्रतिनिधी) :- मध्यरात्रीच्या सुमारास दुचाकीवरून आलेल्या चोरट्यांनी वाहनाचे वायर तोडून जनरेटरसह ते चोरून नेल्याची घटना १४ जुलैला मध्यरात्रीच्या सुमारास गोलाणी मार्केट परिसरात घडली होती. हे वाहन चोरून नेताना वाहनाचा बुलडाणा जिल्ह्यात नांदुरा येथे अपघात झाला. चोरटयांनी वाहन सोडून पळ काढला होता. या चोरट्याना जळगाव शहर पोलीस स्टेशनच्या कर्मचाऱ्यांनी अटक केली आहे.
ही संपूर्ण घटना सीसीटीव्ही कॅमेऱ्यात कैद झाली होती. या प्रकरणी शहर पोलिस ठाण्यात अज्ञात चोरट्याविरुद्ध गुन्हा दाखल करण्यात आला होता. नवी पेठेतील मिलिंद मुकुंद थत्ते (वय ४३) यांचा साऊंड सिस्टीमचा व्यवसाय आहे. त्यांच्याकडे असलेले जनरेटरचे वाहन त्यांनी गोलाणी मार्केटसमोर असलेल्या मायटी ब्रदर्स नावाच्या दुकानासमोर लावलेले होते. दिनांक १४ जुलैला मध्यरात्रीच्या सुमारास एका दुचाकीवरून दोन जण त्याठिकाणी आले. (केसीएन)दोघांमधील एक जण जनरेटर वाहनाच्या (क्र. एमएच १९ एस ०६६६) केबिनचा दरवाजा उघडून आत शिरला व वायरिंग तोडून वाहन सुरू केले आणि जनरेटरसह वाहन असा एकूण ९१ हजार रुपये किमतीचा मुद्देमाल चोरून नेला होता. पोलिसांनी परिसरातील सीसीटीव्ही कॅमेऱ्यांची तपासणी केली असता त्यात चोरीची संपूर्ण घटना कैद झाली होती. त्यानुसार त्यांनी ते फुटेज ताब्यात घेऊन तपास केला.
जळगाव शहर पोलीस स्टेशनचे निरीक्षक सागर शिंपी यांच्या मार्गदर्शनाखाली तपासाधिकारी पोहेकॉ नंदलाल पाटील यांच्यासह पथकाने तपास केला. त्यानुसार सदर चोरटे हे वाहन घेऊन बुलढाणा जिल्ह्यात नांदुरा येथे जात असताना वाहन अपघातग्रस्त झाल्याचे दिसून आले. वाहन ताब्यात घेतल्यावर चोरट्यांचा माग काढला असता नांदुरा जवळ अंभोडा फाट्यावर दोघे जण हॉटेलमध्ये जेवताना आढळले.(केसीएन)शिताफीने पोलिसांनी दोघांना ताब्यात घेऊन जळगावात आणत अटक केली. मंगेश सुनील मिस्तरी (वय २०, कांचन नगर, जळगाव) व यश अनिल सोनार (वय २०, रा. समता नगर, जळगाव, दोन्ही हल्ली मु. शिरसोली ता. जळगाव) असे संशयित आरोपींचे नाव आहे. सदर कामगिरीबद्दल पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, डीवायएसपी संदीप गावित यांनी पथकाचे कौतुक केले आहे.
