मलकापूरजवळ ट्रकला इको कार धडकून भीषण अपघात : भुसावळ, मुक्ताईनगर तालुक्यात शोककळा
जळगाव/मलकापूर (विशेष प्रतिनिधी) : भुसावळ शहरातून मलकापूरकडे वाढदिवसाची पार्टी करण्यासाठी निघालेल्या इको वाहनाची पुढे जाणाऱ्या ट्रक ट्रेलरला जोरदार धडक बसल्याची खळबळजनक घटना बुधवारी, १७ सप्टेंबर रोजी रात्री ११:१५ वाजण्याच्या सुमारास राष्ट्रीय महामार्गावर मुक्ताईनगर ते मलकापूर दरम्यान घडली. या अपघातात या अपघातात पती-पत्नीसह एकूण ४ जणांचा जागीच तर एकाचा जळगावात उपचारादरम्यान मृत्यू झाला असून ४ जण गंभीर जखमी झाले आहेत. जखमींना जळगावातील खासगी रूग्णालयात दाखल करण्यात आले आहे. याप्रकरणी मलकापूर एमआयडीसी पोलीस ठाण्यात गुन्हा दाखल करण्यात आला आहे.
या दुर्दैवी अपघातात ईको कारचा चालक साजिद अजीज बागवान (वय ३०, रा. भुसावळ), त्याची पत्नी तानी साजिद बागवान (वय २५), जुमा शिकडर (वय ४९) यांचेसह एका ३५ वर्षीय अनोळखी महिलेचा मृत्यू झाला.(केसीएन)तर संतोष तेजराव महाले (वय ४०, रा. चिखली, ता. मुक्ताईनगर) यांचा जळगावात सकाळी उपचारादरम्यान मृत्यू झाला. अपघातात पंकज दिलीप गोपाळ (वय २२, रा. नांद्रा हवेली, जि. जळगाव), दीपीका विश्वास (वय ३०, रा. पश्चिम बंगाल), टीना अजय पाटील (वय ४५, रा. भुसावळ) यांच्यासह एक अनोळखी महिला असे एकूण ४ जण गंभीर जखमी झाले आहेत. जखमींना तातडीने जवळच्या रुग्णालयात दाखल करण्यात आले असून, त्यांच्यावर उपचार सुरू आहेत.
साजिद बागवान याचा वाढदिवस असल्याने वरील सर्व ९ जण हे मलकापूरच्या दिशेने वाढदिवस साजरा करण्यासाठी इको कारने निघाले होते. मलकापूरच्या जवळ आल्यावर भरधाव वेगात असलेल्या मारुती ईको कारने (क्रमांक एमएच ४६ एक्स ३१२०) एका अज्ञात ट्रक ट्रेलरला पाठीमागून जोरदार धडक दिली.(केसीएन)ही धडक इतकी जबरदस्त होती कि, इको वाहनाचा चक्काचूर झाला. साजिद बागवान यांच्यासह त्याची पत्नी तानी बागवान, जुमा शिकडर आणि एक महिला हे जागीच ठार झाले. जखमी संतोष महाले यांना जळगाव येथील शासकीय वैद्यकीय महाविद्यालय येथे दाखल करण्यात आले. मात्र उपचारादरम्यान ते मयत झाले.
या अपघाताची माहिती मिळताच एमआयडीसी मलकापूर पोलिस ठाण्याचे अधिकारी सपोनि हेमराज कोळी व सहकारी घटनास्थळी दाखल झाले. या प्रकरणी फिर्यादी अक्षय भास्कर सोनवणे (वय २२, रा. चिखली) यांच्या तक्रारीवरून पोलिसांनी गुन्हा दाखल केला आहे. पोलिसांच्या माहितीनुसार, ईको कार चालक साजिद बागवान याने निष्काळजीपणे आणि बेदरकारपणे वाहन चालवून हा अपघात घडवला.(केसीएन)तो स्वतःच्या आणि कारमधील एक तरूण आणि तीन महिलांच्या मृत्यूला कारणीभूत ठरला. तसेच इतर ४ जणांना गंभीर जखमी केले. दरम्यान, वाढदिवशीच साजिदचा मृत्यू झाल्याने भुसावळ येथे शोककळा पसरली आहे.
मलकापूर एमआयडीसी पोलिसांनी भारतीय न्याय संहितेच्या कलम २८१, १०६ [१], १२५ [बी ], मोटार वाहन कायद्याच्या सहकलम १८४ नुसार गुन्हा दाखल केला आहे. यावरून वाहनचालक आरोपी साजिद अजीज बागवान विरोधात गुरुवारी पहाटे गुन्हा दाखल करण्यात आला. या प्रकरणी मलकापूर येथील दसरखेड एमआयडीसी पोलिसांनी चौघांच्या मृत्यूस कारणीभूत असल्याप्रकरणी चालकाविरोधात गुन्हा दाखल केला आहे. या अपघात प्रकरणाचा तपास सुरू आहे.हा अपघात चालकाच्या निष्काळजीपणामुळे घडल्याचे प्राथमिक तपासात निष्पन्न झाले आहे. सपोनि हेमराज कोळी या प्रकरणाचा पुढील तपास करत आहेत.
