जामनेर नगर परिषदेची कारवाई
जामनेर (प्रतिनिधी):- जामनेर शहरातील मालमत्ता कर व पाणीपट्टी वसुलीच्या कामकाजात सातत्याने अनियमितता आणि कर्तव्यात निष्काळजीपणा आढळल्यामुळे नगरपरिषद प्रशासनाने कठोर पाऊल उचलले आहे. प्रशासनाने याप्रकरणी दोन वसुली लिपिकांना तातडीने निलंबित केले असून त्यांच्याविरुद्ध विभागीय चौकशी प्रस्तावित केली आहे.
समाधान एकनाथ वाघ आणि शे. बिलाल शे. अहमद (दोघेही वसुली लिपिक, नगर परिषद जामनेर) अशी निलंबित करण्यात आलेल्या कर्मचाऱ्यांची नावे आहेत. शहरातील थकीत मालमत्ता कर आणि पाणीपट्टी वसुली प्रभावीपणे करण्यासाठी वरिष्ठ कार्यालयाकडून वारंवार सूचना देऊनही या कर्मचाऱ्यांनी अपेक्षित कार्यवाही केली नाही. काही नागरिकांकडून मालमत्ता कर आकारणी संदर्भात अनियमितता आणि अवैध मागण्यांबाबत तक्रारी प्राप्त झाल्या होत्या. या प्रकरणाचे गांभीर्य लक्षात घेऊन प्रशासनाने कारवाईचा निर्णय घेतला.
महाराष्ट्र नागरी सेवा (शिस्त व अपील) नियमांनुसार ही कारवाई करण्यात आली आहे. या कारवाईबाबत माहिती देताना मुख्याधिकारी नितीन बागुल यांनी स्पष्ट केले की, नागरिकांशी संबंधित कर वसुलीच्या कामकाजात कोणताही गैरप्रकार, निष्काळजीपणा किंवा अनियमितता सहन केली जाणार नाही. शहर प्रशासनामध्ये पारदर्शकता, शिस्त आणि जबाबदारीला प्राधान्य दिले जाईल आणि भविष्यातही अशाच प्रकारची कडक कारवाई सुरू राहील. जामनेर शहराच्या विकासासाठी आणि कर वसुली प्रक्रिया पारदर्शक करण्यासाठी नगरपरिषद प्रशासन कटिबद्ध असल्याचेही त्यांनी यावेळी नमूद केले.
