पिंप्राळा परिसरात हनुमान मंदिराजवळ घडली घटना
जळगाव (प्रतिनिधी) : जळगाव शहरात शनिवारी दुपारी मोठा पाऊस होऊन विजांचा कडकडाट झाला. पिंप्राळ्यातील शंकरअप्पा नगरातील कष्ट भंजन वीर हनुमान मंदिरावर तर वीज कोसळली. या मंदिराच्या परिसरात खेळत असणारी लहान मुले बालंबाल बचावली आहेत. तर मंदिराच्या कळसाचे नुकसान झाले तर मंदिराच्या भींतीला मोठे छिद्र पडले. विजेच्या मोठ्या आवाजामुळे मुलांसह नागरिक काही काळ प्रचंड घाबरली होती.
शहरात शनिवारी दि. १५ जून रोजी दुपारी मुसळधार पाऊस झाला. अनेक वाहनधारकांचे हाल झाले. पिंप्राळा परिसरात तर ४ वाजेच्या सुमारास विजांचा कडकडाट झाला व त्याचवेळी मंदिरावर वीज कोसळली. यावेळी मोठा आवाज झाला. मंदिरात प्रणव पाटील, रोहित पाटील, चिराग सपकाळ, कार्तिक पाटील, ओम पाटील, हर्षल फुलपगारे, जय वाघ, दर्शन वाघ व पार्थसह अन्य १० ते १२ मुले खेळत होती. वीज कोसळल्यानंतर आवाज ऐकून नागरिक घरातून बाहेर निघाले.
माजी नगरसेवक चंद्रकांत कापसे, मंडळाचे अध्यक्ष प्रमोद सोनार, रघुनाथ पाटील, शंकर पाटील, प्रताप पाटील, पांडूरंग जाधव, डॉ. कैलास पाटील यांनी धाव घेत मुलांना सुखरूप घरी पोचवले. या ठिकाणी मोठी गर्दी झाली होती. सिमेंटचा कळस पुर्णपणे तुटला आहे तर त्यालाच लागून मोठे छिद्र पडले आहे. घटनेची जिल्हा प्रशासन माहिती घेत होती.
