अनधिकृत बॅनरबाजीवर मनपाचा प्रहार
जळगाव ( प्रतिनिधी ) – जळगाव शहराच्या विद्रुपीकरणाला कारणीभूत ठरणाऱ्या अनधिकृत बॅनर आणि स्टिकर्सवर महानगरपालिकेच्या अतिक्रमण निर्मूलन विभागाने मोठी कारवाई केली आहे. बुधवारी राबवलेल्या विशेष मोहिमेअंतर्गत, मू.जे. महाविद्यालय परिसरात विनापरवाना फलक लावणाऱ्या दोन खाजगी क्लास चालकांना प्रत्येकी ६० हजार रुपयांचा दंड ठोठावण्यात आला आहे.
शहराच्या सौंदर्याला बाधा आणणाऱ्या आणि वाहतुकीला अडथळा ठरणाऱ्या अनधिकृत बॅनरबाजीवर मनपा प्रशासनाने कडक पाऊले उचलली आहेत. अग्रवाल चौक ते मू.जे. महाविद्यालय या परिसरात राजकीय, सामाजिक आणि शैक्षणिक संस्थांच्या बॅनरचा मोठा सुळसुळाट झाला होता. बुधवारी सकाळी मनपाच्या पथकाने या भागात धडक मोहीम राबवून सुमारे ६० मोठे बॅनर जप्त केले. केवळ मोठे बॅनरच नव्हे, तर शहरात ठिकठिकाणी भिंतींवर, खांबांवर आणि सार्वजनिक ठिकाणी हजारोच्या संख्येने लहान फलक व विनापरवाना स्टिकर्स लावून जाहिरातबाजी करणाऱ्या दोन खाजगी क्लास चालकांवर मनपाने थेट आर्थिक दंडाचा बडगा उगारला आहे.
नियमांचे उल्लंघन करून शहराचे विद्रुपीकरण केल्याबद्दल डंबेलकर आणि पेस अकॅडमी या क्लास चालकांना प्रत्येकी ६० हजार रुपयांच्या दंडाची नोटीस बजावण्यात आली आहे. मनपाच्या या धडक कारवाईमुळे अनधिकृत जाहिरातदारांचे धाबे दणाणले आहेत. या कारवाईनंतर काही संस्थांनी स्वतःहून आपले अनधिकृत बॅनर आणि स्टिकर काढण्यास सुरुवात केली आहे. शहर स्वच्छ आणि सुंदर ठेवण्यासाठी ही मोहीम यापुढेही अशीच सुरू राहणार असल्याचे मनपा प्रशासनाकडून स्पष्ट करण्यात आले आहे.
