जळगाव (प्रतिनिधी) : प्रादेशिक परिवहन विभागाला नवीन आरटीओ अधिकारी मिळाले आहेत. कोल्हापूरचे उपप्रादेशिक परिवहन अधिकारी दीपक पाटील यांची पदोन्नतीवर जळगाव आरटीओ म्हणून नियुक्ती करण्यात आली आहे. सोमवार दिनांक १० जून रोजी दीपक पाटील हे पदभार स्वीकारणार आहेत.
राज्य परिवहन आयुक्त विवेक भिमानवार यांनी गुरुवारी राज्यातील उपप्रादेशिक परिवहन अधिकारी यांच्या पदोन्नतीसह बदलीचे आदेश काढले होते. त्याच पार्श्वभूमीवर कोल्हापूर येथे कार्यरत असलेले दीपक पाटील यांना कोल्हापूर येथून कार्यमुक्त होऊन जळगाव आरटीओ पदाचा कारभार स्वीकारण्याचे आदेश देण्यात आले आहे.
जळगावचे उपप्रादेशिक परिवहन अधिकारी शाम लोही यांच्या बढती व बदलीचे आदेश अद्याप प्राप्त झालेले नाहीत. दीपक पाटील यापूर्वी नंदुरबार नगर, बारामती, व सध्या ते कोल्हापूर येथे उपप्रादेशिक परिवहन अधिकारी म्हणून कार्यरत होते.
