जळगाव तालुक्यातील चिंचोली येथील घटना
जळगाव (प्रतिनिधी) : भांडण सोडविण्यासाठी गेलेले चेतन वसंत देऊळकर (२१, रा. कुसुंबा, ता. जळगाव) व त्यांच्या मित्राला चार जणांनी शिवीगाळ करीत मारहाण केली. ही घटना गुरुवारी दि. १२ सप्टेंबर रोजी चिंचोली येथे शासकीय रुग्णालयाच्या बांधकामाच्या ठिकाणी घडली. या प्रकरणी एमआयडीसी पोलिस ठाण्यात चार जणांविरुद्ध गुन्हा दाखल करण्यात आला आहे.
तालुक्यातील चिंचोली येथे सुरू असलेल्या शासकीय रुग्णालयाच्या बांधकामाच्या ठिकाणी काही जणांचे भांडण सुरू होते. त्या वेळी चेतन देऊळकर व त्यांचे मित्र भांडण सोडविण्यासाठी गेले असता चार जणांनी शिवीगाळ करीत एकाने चेतन यांच्या डोक्यात लोखंडी सळई मारली. तसेच त्यांच्या मित्राला मारहाण करीत जिवे ठार मारण्याची धमकी दिली. या प्रकरणी चेतन देऊळकर यांनी एमआयडीसी पोलिस ठाण्यात फिर्याद दिली. त्यावरून मारहाण करणाऱ्या चार जणांविरुद्ध गुन्हा दाखल करण्यात आला आहे. पुढील तपास पोहेकॉ गफूर तडवी करीत आहेत.
