गोदावरी कॉलेज ऑफ नर्सिंगचा उपक्रम
जळगाव (प्रतिनिधी) :- गोदावरी नर्सिंग महाविद्यालयातील विद्यार्थ्यांनी कम्युनिटी हेल्थ नर्सिंग विभागाच्या वतीने जागतिक कर्करोग दिनानिमित्त चांडक कॅन्सर हॉस्पिटल, जळगाव येथे कर्करोग जनजागृती कार्यक्रमाचे आयोजन केले होते.
या वेळी नर्सिंग विद्यार्थ्यांनी रुग्णांना कर्करोगाविषयी जनजागृती, लवकर निदानाचे महत्त्व, प्रतिबंधात्मक उपाय तसेच वेळेवर उपचार घेण्याची आवश्यकता याबाबत आरोग्य शिक्षण दिले. या उपक्रमाचा उद्देश रुग्णांमध्ये कर्करोगाविषयी जागरूकता वाढविणे व सकारात्मक आरोग्यवर्तनास प्रोत्साहन देणे हा होता. यावेळी डॉ. निलेश चांडक व डॉ. सागर व्यास यांनी विद्यार्थ्यांना कर्करोगाचे विविध प्रकार, उपचार पद्धती तसेच केमोथेरपी संदर्भात सविस्तर मार्गदर्शन केले. त्यांच्या मार्गदर्शनामुळे विद्यार्थ्यांचे कर्करोग उपचारांबाबतचे क्लिनिकल ज्ञान व व्यावसायिक समज अधिक सुदृढ झाली.हा कार्यक्रम रुग्ण व विद्यार्थ्यांसाठी अत्यंत माहितीपूर्ण व उपयुक्त ठरला. या उपक्रमामुळे समाजात कर्करोगाविषयी जनजागृती वाढली असून नर्सिंग विद्यार्थ्यांच्या व्यावसायिक शिक्षणाला मोलाची भर पडली आहे.
