जिल्हाधिकाऱ्यांचे दुर्लक्ष, मंगळवारी १२८ शेतकऱ्यांचे आंदोलन
जळगाव (प्रतिनिधी) : इंदौर हैदराबाद महामार्ग चौपदरीकरण कामासाठी मंगळवार दि. ११ रोजी राष्ट्रीय महामार्ग ७५ एल या रस्त्यात जमीन अधिग्रहीत झालेल्या ९ गावांमधील १२८ शेतकरी काम बंद आंदोलन करणार आहेत. कारण त्यांना महाराष्ट्र रेडीरेकनरनुसार दर देण्यात आलेला नाही. तत्कालीन प्रांत अधिकारी यांनी चुकीचे दर लावून शेतकऱ्यांना मोबदला दिला आहे. इंदौर हैदराबाद महामार्गाच्या चौपदरीकरण कामासाठी शेत जमीन भूसंपादनात मोठा घोटाळा होत असल्याचा आरोप करण्यात येत आहे. या भूसंपादनात शेतकऱ्यांवर अन्याय होत असून सरकार शेतकऱ्यांच्या बाजूने नाही, अशा शब्दात शिवसेना शिंदे गटाचे आमदार चंद्रकांत पाटील यांनी सरकारला घरचा आहेर दिला आहे.
याबाबत जिल्हाधिकाऱ्यांकडे दावा दाखल करूनही जिल्हाधिकाऱ्यांनी कोणतीही सुनावणी न घेता थेट निर्णय देत जुने दर कायम ठेवलेले आहेत. त्यामुळे शेतकऱ्यांनी या अन्यायाविरोधात मंगळवार दि. ११ रोजी काम बंद आंदोलन पुकारले आहे. आघाडी सरकारने बेटिंग मेथड नुसार शेत लाभार्थी शेतकऱ्यांचे पैसे कपात होणार आहे यावरही शेतकऱ्यांनी हा कायदा नसल्याचे पत्रकारांशी बोलताना सांगितले. सदर जमिन अधिग्रहीत यादीमध्ये एकनाथराव खडसे व त्यांच्या परिवारातील केंद्रीय मंत्र्यांसह सर्वांची नावे आहेत, यांच्या जमिनी यामध्ये अधिग्रहित झालेल्या आहेत, अशी माहिती मिळाली. भूसंपादनात शेतकऱ्यांची जमीन दुसऱ्याच्या नावावर दाखवण्यात आल्याचा प्रकार घडला आहे. याचा फटका आमदार चंद्रकांत पाटील यांनाही बसला आहे. त्यांनी आता या प्रकरणी संतप्त होत टोकाचा निर्णय घेण्याचा इशारा दिला आहे.
