बंगळुरू (वृत्तसंस्था ) ;- कर्नाटकातील शिवमोगा येथे गुरुवारी रात्री साडेदहाच्या सुमारास डायनामाइटचा स्फोट झाला, त्यात 8 कामगार ठार झाले. मुख्यमंत्री बीएस येदियुरप्पा यांनी उच्चस्तरीय तपासाचे आदेश दिले आहेत. शुक्रवारी सकाळी पोलिस आणि अधिकाऱ्यांची टीम घटनास्थळ हुनासोडू गावात पोहोचली. संपूर्ण परिसर सील करण्यात आला आहे.
पोलिसांनी दिलेल्या माहितीनुसार, दगड फोडण्यासाठी विस्फोटक (जिलेटिन स्टिक्स) नेले जात होते. तेव्हाच शिवमोगा येथील अब्बलगेरे गावाजवळ स्फोट झाला. हा स्फोट इतका मोठा होता की त्याचा आवाज शिवमोगा जवळचा जिल्हा चिकमगलूरपर्यंत गेला आणि आजूबाजूच्या भागात भूकंपसदृश धक्के जाणवले.काही लोकांचा दावा आहे की, एकानंतर एक 50 डायनामाइट ब्लास्ट झाले. स्फोटाच्या आवाजाने आजुबाजूच्या घराच्या काचा फुटल्या. लोकांना वाटले की, भूकंप आला आहे. यामुळे लोक घाबरुन घरातून बाहेर निघाले. 8-10 किमी पर्यंत स्फोटकांचा गंध देखील जाणवला. शिवमोगा हा कर्नाटकचे मुख्यमंत्री बी एस येडियुरप्पा यांचा मूळ जिल्हा आहे.
