पिंप्राळा हुडको परिसरात मतदानासाठी उत्साह
शेवटच्या टप्प्यात मतदारांच्या लांबच लांब रांगा
निवडणुकीच्या शेवटच्या तासांमध्ये पिंप्राळा हुडको परिसरातील प्रभाग क्रमांक १० मध्ये मतदारांचा प्रचंड उत्साह पाहायला मिळत आहे. येथील मौलाना अबुल कलाम आझाद केंद्र आणि ज्ञानसाधना प्राथमिक विद्यालय या दोन्ही केंद्रांवर मतदारांच्या लांबच लांब रांगा लागल्या असून, नागरिक मतदानासाठी मोठी धावपळ करताना दिसत आहेत.
मतदान केंद्रावर गर्दी वाढल्याने कोणताही अनुचित प्रकार घडू नये यासाठी पोलिसांनी कंबर कसली आहे. रामानंदनगर पोलीस स्टेशनचे निरीक्षक राजेंद्र गुंजाळ, एपीआय संदीप पाटील यांच्या मार्गदर्शनाखाली या ठिकाणी तगडा पोलीस बंदोबस्त तैनात करण्यात आला आहे. पोलीस कर्मचाऱ्यांची शिस्तबद्ध कामगिरी आणि त्यांचा दरारा केंद्रावर स्पष्टपणे जाणवत असून, गर्दीवर नियंत्रण मिळवण्यासाठी पोलीस चोख भूमिका बजावत आहेत.
मतदानाची वेळ संपायला अवघा अर्धा तास शिल्लक असताना केंद्रावर मतदारांची झुंबड उडाली होती. अनेक नागरिक घाईघाईने आपला मतदानाचा हक्क बजावण्यासाठी धावपळ करत आहेत. आता साडेपाच वाजता पोलिसांकडून गेट बंद करण्यात आले असून गेट मधील मतदारांना मतदानाचा हक्क बजावता येणार आहे. या परिस्थितीत मतदारांना योग्य मार्गदर्शन करताना आणि प्रक्रिया सुरळीत पार पाडताना निवडणूक अधिकारी व कर्मचाऱ्यांची मोठी तारांबळ उडत असल्याचे चित्र दिसून आले. उशिरापर्यंत रांगेत उभ्या असलेल्या प्रत्येक मतदाराला मतदानाची संधी मिळावी, यासाठी प्रशासन प्रयत्नशील आहे.
