भुसावळ बाजारपेठ पोलिसांची कारवाई
भुसावळ (प्रतिनिधी) : जळगाव जिल्ह्यातून दोन वर्षांसाठी हद्दपार करण्यात आलेल्या आरोपीने तलवार बाळगून दहशत निर्माण केल्याची माहिती बाजारपेठ पोलिसांच्या डीबी पथकाला मिळाल्यानंतर संशयीतास रविवारी रात्री सव्वादहा वाजता मच्छीमार्केट भागातून पकडण्यात आले. आरोपीच्या ताब्यातून धारदार तलवार जप्त करण्यात आली. त्याच्याविरुद्ध बाजारपेठ पोलीस स्टेशनला गुन्हा दाखल करण्यात आला आहे.
आकाश उर्फ चॅम्पीयन श्याम इंगळे (वय २४, पंचशील नगर, भुसावळ) असे अटकेतील गुन्हेगाराचे नाव आहे. चॅम्पीयन इंगळे यास गुन्हेगारी पार्श्वभूमीमुळे दोन वर्षांसाठी जिल्ह्यातून हद्दपार करण्यात आले आहे. मात्र शहरात विनापरवानगी दाखल होवून तलवार बाळगून दहशत निर्माण करीत असल्याची माहिती बाजारपेठ पोलीस निरीक्षक राहुल वाघ यांना मिळाली. त्यांनी कारवाईचे निर्देश दिले.
रविवारी रात्री सव्वा दहा वाजता आरोपी मच्छी मार्केट समोरील नाल्याच्या पुलावर तलवार बाळगून आरडा-ओरड करीत दहशत निर्माण करीत असताना पथकाला आढळल्याने त्यास अटक करण्यात आली. आरोपीच्या ताब्यातून ५०० रुपये किंमतीची व २२.५ इंच लांबीची तलवार जप्त करण्यात आली. संशयित आरोपीविरोधात गुन्हा दाखल करण्यात आला. तपास हवालदार निलेश चौधरी करीत आहेत.
