जीएसटी विभागाची धडक कारवाई, गुन्हा दाखल
जळगाव (प्रतिनिधी) : वस्तू व सेवा कर विभागाच्या वतीने विशेष मोहीमे अंतर्गत ११९ कोटींची खोटी देयके सादर करून २६ कोटींची करचोरी करणाऱ्या एकाला अटक करण्यात आली आहे. रामानंद नगर पोलीस स्टेशन अंतर्गत त्याच्यावर गुन्हा दाखल करण्यात आला आहे.
बनावट बिलांच्या विक्रीमध्ये सहभागी असलेल्या करदात्यांविरुद्ध महाराष्ट्र वस्तू व सेवा कर विभागाने सुरू केलेल्या विशेष मोहिमेचा एक भाग म्हणून जळगाव येथील अग्रवाल असोसिएटसची चौकशी करण्यात आली. यामध्ये अग्रवाल असोसिएटसचे मालक नैनेश संतोष अग्रवाल यांनी प्रत्यक्षात कुठल्याही मालाची विक्री न करता खोटी बिले देऊन बनावट कर वजावटीचा पुरवठा केला, असे दिसून आले.
या प्रकरणात नैनेश अग्रवाल याला अटक करण्यात आली. तसेच जिल्हा सामान्य रुग्णालयात त्याची वैद्यकीय तपासणी करण्यात आली. त्यानंतर त्याला न्यायालयात हजर करण्यात आले. न्यायालयाने त्याला १४ दिवसांची कोठडी सुनावली आहे. महाराष्ट्र वस्तू आणि सेवा कर विभागाने पुन्हा एकदा करचोरी करणाऱ्यांना आणि बनावट पावत्या जारी करणाऱ्या आणि बनावट इनपुट टॅक्स क्रेडिटचा दावा आणि पासिंग करणाऱ्या व्यक्तींना कठोर इशारा दिला आहे.
नाशिक परिक्षेत्राचे अपर राज्यकर आयुक्त सुभाष एंगडे, जळगाव विभागाचे राज्यकर सहआयुक्त सुभाष परशुराम भवर यांच्या मार्गदर्शनाखाली तसेच अन्वेषण शाखेचे राज्य कर उपायुक्त महेंद्र शिंदे, सहायक राज्यकर आयुक्त माहूल संजयकुमार इंदानी, यांच्या नेतृत्वाखाली रविंद्र पोटे सहायक राज्यकर आयुक्त, राज्यकर निरीक्षक व कर सहाय्यक यांनी ही कारवाई अंमलात आणली.
