जळगाव ( प्रतिनिधी ) – तालुक्यातील शिरसोली गावाजवळ असलेल्या एका हॉटेलमध्ये ग्राहक व हॉटेल मालकात सुरू असलेल्या वादात मध्यस्थी करणे एकाला चांगलेच भोवले आहे. शिरसोली गावाच्या ग्रामपंचायत सदस्याला मध्यस्थी केली म्हणून त्याच्यावर चॉपरने तीन वार करून तसेच लाकडी दांडक्याने मारहाण करून गंभीर जखमी करण्यात आले आहे.
नितीन अर्जुन बुंधे (वय – 34, रा. शिरसोली प्र.बो., ता. जि.जळगाव) असे जखमी व्यक्तीचे नाव आहे. शिरसोली गावाजवळ जळगाव रस्त्यावर असलेल्या प्रशांत हॉटेलमध्ये जेवणाचे बिल देण्यावरून हॉटेल मालक आणि एका ग्राहकात वाद सुरू होता. ग्राहकाच्या म्हणण्यानुसार, भाजीचा रस्सा पाणी पाणी दिला. परंतु त्या हॉटेल मालकाने बिल लावलं यावरून हा वाद पेटला.
हा वाद तेथे असलेल्या ग्रामपंचायत सदस्य नितीन बुंधे यांनी पाहिला. त्यांनी दोघांमध्ये मध्यस्थी करण्याचा प्रयत्न केला. याचा राग आल्याने ग्राहक सोबत असलेल्या एका व्यक्तीने त्याच्या दोन मित्राला बोलावून घेतले. दोन्ही जणांनी नितीन बुंधे याच्यावर गैरसमजुतीतून पाठीत चोपरने वार करून लाकडे दांडक्याने जबर मारहाण केली. नितीन बुंधे रक्तबंबाळ स्थितीत खाली पडताच एकच धावपळ उडाली.
नागरिकांनी त्यास जखमी अवस्थेत शासकीय वैद्यकीय महाविद्यालय व रुग्णालय, जळगाव येथे उपचारासाठी दाखल केले. त्या ठिकाणी प्रथमोपचार झाल्यानंतर नितीन बुंधे यास खाजगी रुग्णालयात दाखल करण्यात आले आहे. दरम्यान, एमआयडीसी पोलीस स्टेशनच्या कर्मचाऱ्यांना माहिती मिळताच त्यांनी घटनास्थळी धाव घेतली आहे. घटनेची माहिती पोलीस घेत असून संशयित मारेकरी कोण आहेत याबद्दल पोलीस विचारपूस करीत आहेत. हाॅटेल मध्ये व बाहेर सीसीटीव्ही फुटेज आहे. अद्यापपर्यंत एमआयडीसी पोलिस स्टेशनमध्ये गुन्हा दाखल झाला नाही आहे.
