यावल तालुक्यातील चिंचोली गावाजवळ घटना
जळगाव (प्रतिनिधी) : बियर न दिल्याच्या कारणावरून दोघांनी पुतण्याच्या हॉटेलवरुन घरी परत येण्यासाठी निघालेल्या रेल्वे कर्मचाऱ्यावर गोळीबार केल्याची घटना गुरुवारी रात्री १० ते १०.३० वाजेच्या सुमारास घडली. या घटनेत कर्मचाऱ्याच्या छातीला व मानेला गोळी लागली असून ते गंभीर जखमी झाले आहे. त्यांच्यावर जळगाव येथील एका खासगी रुग्णायात उपचार सुरु असून त्यांची प्रकृती स्थिर आहेत.
प्रमोद श्रीराम बाविस्कर (वय ४०, रा. चंदू अण्णा नगर, जळगाव) असे जखमी तरुणाचे नाव आहे. त्यांच्या पुतण्याचे यावल तालुक्यातील चिंचोली गावाजवळ मनुदेवी फाट्याजवळ रायबा नावाचे हॉटेल आहे. दरम्यान, प्रमोद बाविस्कर हे गुरुवारी १० जुलैला पुतण्याच्या हॉटेलवर गेले होते. दरम्यान, प्रमोद बाविस्कर हे रात्री ९.३० वाजेच्या सुमारास मनुदेवी फाट्याजवळील हॉटेल रायबा बाहेर परत जळगाव येथे येण्यासाठी कारमध्ये बसले होते. त्याच वेळी दोन अनोळखी व्यक्ती त्यांच्या हॉटेलवर आले आणि त्यांनी हॉटेल सुरू करून दारू देण्याची मागणी केली. बाविस्कर यांनी हॉटेल बंद झाल्याचे सांगत त्यांना दुसऱ्या हॉटेलमध्ये जायला सांगितले त्याचा राग आल्याने अज्ञात हल्लेखोरांनी थेट प्रमोद बाविस्कर यांच्या दिशेने गोळीबार केला.
या गोळीबारात प्रमोद बाविस्कर यांच्या मानेला व छातीला गोळी लागल्याने ते गंभीर जखमी झाले आहेत.गोळीबार केल्यानंतर हे हल्लेखोर तत्काळ घटनास्थळावरून पळ पळाले. घटनेमुळे खळबळ हॉटेलमध्ये उपस्थित असलेल्या बाविस्कर यांच्या मुलासह इतर कर्मचाऱ्यांच्या ही बाब लक्षात येताच, त्यांनी तातडीने जखमी प्रमोद बाविस्कर यांना जळगाव येथील एका खासगी रुग्णालयात उपचारासाठी दाखल केले आहे. सध्या त्यांची प्रकृती स्थिर असून, त्यांच्यावर उपचार सुरू आहेत. या घटनेमुळे परिसरात खळबळ उडाली असून, पोलीस पुढील तपास करत आहेत.
या घटनेची माहिती मिळताच यावल येथील पो.नि. रंगनाथ धारबळे तसेच चोपडा येथील उपविभागीय पोलीस अधिकारी अण्णासाहेब घोलप यांनी घटनास्थळी धाव घेतली. त्यानंतर पोलीस अधिकारी व कर्मचाऱ्यांनी घटनास्थळाची पाहणी करुन तत्काळ तपासाला गती दिली. तर जळगाव मध्ये अरुश्री हॉस्पिटल येथे पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते यांनी भेट देऊन घटनेची माहिती जाणून घेतली. दरम्यान गोळीबाराच्या घटनेमुळे यावल तालुका हादरला आहे. हल्लेखोरांच्या शोधासाठी पोलिसांनी पथके रवाना केली आहे.
