जळगावात रात्रीच्या घटनेत ९ जणांवर गुन्हा दाखल
जळगाव (प्रतिनिधी) : शहरातील एम.जे. कॉलेजमागील परिसरात गुलमोहर कॉलनीजवळ मीनाताई ठाकरे मार्केटजवळ गुरुवारी रात्री साडेनऊ वाजता झालेल्या गोळीबार प्रकरणात रामानंदनगर पोलिसांनी पाचोरा इथून एकाला ताब्यात घेतले आहे. तर रामनवमीच्या दिवशी वडिलांना मारहाण केल्याच्या रागातून संशयित आरोपीने हे कृत्य केल्याचे फिर्यादीतून समोर आले आहे.
महेंद्र समाधान सपकाळे (वय २०, रा.प्रबुद्ध नगर, पिप्राळा,जळगाव) असे जखमी तरुणाचे नाव आहे. त्यानेच फिर्यादही दिली आहे. गुरुवारी दि. एप्रिल रोजी रात्री नऊ ते साडेनऊ वाजेच्या दरम्यान महेंद्र सपकाळे यांचा मित्र भूषण मनोज अहिरे यांचा वाढदिवस असल्याने त्याचा केक कापण्यासाठी त्याने गुलमोहर कॉलनीतील सेंट जोसेफ शाळेच्या मेन गेट समोर महेंद्र सपकाळे, अक्षय नारायण राठोड, सचिन चौधरी यांना बोलावले होते.(केसीएन)तेथे भूषण अहिरे याचा केक कापत असताना त्या ठिकाणी संशयित आरोपी विशाल भिकन कोळी, वैभव उर्फ धीरज कोळी, भोला भोई व इतर चार ते पाच जण आले.
त्यांनी महेंद्र सपकाळे याला विशाल कोळी म्हणाला की, रामनवमीच्या दिवशी तू माझ्या वडिलांना मारले आहे. मी तुला सोडणार नाही असे सांगून त्याने पाठीमागील बाजूस कंबरेतून बंदूक काढून त्याद्वारे महिंद्रा सपकाळे याला जीवे ठार मारण्याच्या उद्देशाने पाठीमागून बाजूस कमरेच्या खाली गोळी झाडली. तर इतर संशयित आरोपींनी लाथाबुक्क्यांनी मारहाण केली.(केसीएन)विशाल कोळी याने पुन्हा गोळी झाडण्याचा प्रयत्न केला असता सचिन चौधरी व भूषण अहिरे यांनी विशाल कोळी याला ढकलले. त्यात सचिन चौधरी यालाही किरकोळ दुखापत झाली आहे. गोळी झाडल्याचा आवाज झाल्याने तिथे गर्दी जमा झाली.
त्यामुळे संशयित आरोपी पळून गेले. जखमी महेंद्र सपकाळे याने त्याचा मित्र मनोज रमेश भालेराव याला फोन लावून बोलावून घेतले. त्यानंतर जखमीला दुचाकीवर शासकीय वैद्यकीय महाविद्यालय व रुग्णालयात उपचारासाठी दाखल करण्यात आले.(केसीएन)त्यानुसार संशयित आरोपी विशाल भिकन कोळी, वैभव उर्फ धीरज कोळी, भोला भोई व इतर चार ते पाच जण यांच्याविरुद्ध गुन्हा दाखल करण्यात आला आहे. दरम्यान रात्री रामानंदनगर पोलीस स्टेशनच्या कर्मचाऱ्यांनी पाचोरा इथून नितेश जाधव या संशयित आरोपीला ताब्यात घेतल्याची माहिती मिळाली आहे.
