पोलीस अधीक्षकांसह पोलीस दल घटनास्थळी कारण अस्पष्ट
जळगाव (प्रतिनिधी) : शहरातील तांबापुरा परिसरातील शेरा चौक येथे विधानसभा निवडणुकीतील एका अपक्ष उमेदवाराच्या घरावर २ राऊंड फायर करून गोळीबार झाल्याची धक्कादायक घटना सोमवार दि.१८ नोव्हेंबर रोजी पहाटे ४ वाजेच्या सुमारास घडली आहे. याप्रकरणी एलसीबी व एमआयडीसी पोलीस स्टेशनचे अधिकारी व कर्मचारी तपास करीत आहेत.
अहमद हुसेन शेख (वय ५०, रा. शेरा चौक, तांबापुरा परिसर, जळगाव) हे सुरू असलेल्या विधानसभा निवडणुकीमध्ये अपक्ष उमेदवार म्हणून निवडणूक लढवीत आहेत.(केसीएन)एमआयएम पक्षाचे ते पूर्वी माजी जिल्हाध्यक्ष होते. परिवारासह ते शेरा चौकात राहतात. शिक्षक म्हणून शिक्षण सेवा करीत परिवाराचा उदरनिर्वाह ते करीत आहेत. दरम्यान, सोमवारी दि. १८ नोव्हेंबर रोजी पहाटे शेरा चौकातील नागरिक साखर झोपेत असताना पहाटे साडेतीन ते चार वाजेच्या सुमारास अज्ञात २ दुचाकीस्वारांनी येऊन त्यांच्या घरावर २ राऊंड फायर केले. यात त्यांच्या घराच्या खिडकीचा काच फुटला आहे.
घटनेची माहिती कळताच कुटुंबीय खडबडून जागे झाले. त्यांनी तात्काळ पोलीस स्टेशनला ही घटना कळवली. नागरिकांना घटना कळताच अहमद शेख यांच्या घराजवळ गर्दी केली.(केसीएन)दरम्यान, पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, डीवायएसपी संदीप गावित, एमआयडीसी पोलीस स्टेशन निरीक्षक दत्तात्रय निकम यांच्यासह अधिकारी घटनास्थळी दाखल झाले. कर्मचाऱ्यांनी आजूबाजूचे सीसीटीव्ही फुटेज गोळा केले असता त्यात घटना कैद झाल्याचे दिसून आले आहे. दरम्यान हल्लेखोरांची माहिती काढून त्यांचा शोध घेणे सुरू झाले आहे.
याबाबत फिर्याद देण्यासाठी पोलीस स्टेशनला तक्रारदार गेले असल्याची माहिती पोलीस निरीक्षक दत्तात्रय निकम यांनी दिली. दरम्यान, अहमद शेख यांनी माध्यमांशी बोलताना सांगितले की, सकाळी गाढ झोपेत असताना अचानक काहीतरी फुटल्याचा आवाज आला. (केसीएन)थोड्यावेळाने पाहिले तर खिडकीचा काच तुटलेला दिसला आणि एक गोळी दिसली. आणखी एक गोळी पोलीस शोधण्याचे काम करीत आहे. घटनेमागे नेमके काय कारण असू शकते हे निश्चित सांगता येत नाही. मात्र मी आज शेवटच्या दिवशी प्रचार सुरूच ठेवणार असल्याचे अहमद शेख यांनी शेवटी सांगितले.
दरम्यान मुक्ताईनगर बोदवड विधानसभा मतदार संघातील अपक्ष उमेदवार विनोद सोनवणे यांच्यावर बोदवड येथे एका प्रचार रॅली दरम्यान काही तरुणांनी गोळीबार केल्याचा प्रकार घडला होता. त्यानंतर आता हा दुसरा प्रकार जिल्ह्यात घडला आहे.
