रामेश्वर कॉलनी येथील घटना, तिघांवर गुन्हा दाखल
जळगाव (प्रतिनिधी) : जुन्या वादातून रामेश्वर कॉलनी येथील रिक्षा चालकाच्या घरावर मध्यरात्री बंदुकीतून गोळी झाडून दहशत निर्माण करणाऱ्या तरुणासह तिघांवर एमआयडीसी पोलीस स्टेशनला गुन्हा दाखल करण्यात आला आहे. याप्रकरणी पोलिसांनी पुढील तपास सुरू केला आहे.
राम विश्वास बोरसे (वय २६ वर्ष, रा. मंगलपुरी परिसर, रामेश्वर कॉलनी, जळगाव) यांनी फिर्याद दिली आहे. ते आई, वडील, भाऊ, वहिनी यांच्यासह राहतात. रिक्षा चालवून त्यावरील उत्पन्नावर ते परिवाराचा उदरनिर्वाह करतात.(केसीएन)मेहरूण परिसरातील संशयित आरोपी दिनेश भारत चौधरी यांच्या बहिणीचा घटस्फोटासाठी अर्ज न्यायालयात प्रलंबित आहे. तसेच जानेवारी महिन्यात दिनेशची बहिण ही घरातून पळून गेली होती. या सर्व प्रकाराला रिक्षाचालक राम विश्वास बोरसे हाच जबाबदार आहे असा संशय दिनेश चौधरी याला होता. त्यावरून त्याने राम बोरसे याला शिवीगाळ करून जीवे ठार मारण्याची धमकी दिली होती. याबाबत राम बोरसे याने यापूर्वी एमआयडीसी पोलीस स्टेशनला तक्रार दाखल केलेली आहे.
दरम्यान, शुक्रवारी दि. २५ एप्रिल रोजी पहाटे दीड वाजेच्या सुमारास राम बोरसे याने घरात गर्मी होत असल्याने लाकडी दरवाजा उघडा ठेवला व लोखंडी ग्रीलचा दरवाजा बंद ठेवला होता. पहाटे दीड वाजेच्या सुमारास अचानक राम बोरसे यांना गोळीबाराचा आवाज आला.(केसीएन)त्यांचे वडील दरवाजाकडे गेले असता त्यांनी दोन लोकांना घराच्या पोर्चमध्ये पाहिले. तर एक इसम घरासमोर बाईक घेऊन थांबलेला दिसला. राम बोरसे हे दरवाजा जवळ आले असता पोर्चमधील दोन्ही इसम उड्या मारून रस्त्यावरील दुचाकीस्वाराकडे पळाले. त्यातील एक दिनेश भारत चौधरी हा असल्याचे राम बोरसे यांना दिसले. तिघेही संशयित दुचाकीवर बसून निघून गेले.
यानंतर राम बोरसे यांनी पाहिले असता रस्त्यावर गोळीची पुंगळी पडलेली दिसली. तसेच लोखंडी दरवाजाच्या ग्रीलवर गोळी लागल्याचे निशाण दिसून आले तर आतल्या बाजूस गोळीचे तुकडे पडलेले दिसले.(केसीएन)यामुळे त्यांनी एमआयडीसी पोलीस स्टेशनला माहिती दिली. यावरून पोलीस स्टेशनला संशयित आरोपी दिनेश भारत चौधरी आणि इतर दोन्ही इसमांवर गुन्हा दाखल करण्यात आला आहे. दरम्यान सलग दुसऱ्या दिवशी गोळीबारीची घटना जळगाव शहरात घडल्यामुळे नागरिकांमध्ये वातावरण आहे.
००००००००
