जळगाव (प्रतिनिधी): – गोदावरी नर्सिंग कॉलेज, जळगाव येथे ग्रामीण कौशल्यांना प्रोत्साहन देण्यासाठी आयोजित करण्यात आलेल्या हस्तकला कौशल्य सत्राचे आयोजन करण्यात आले होते. या सत्रात विद्यार्थिनींनी मोठा सहभाग नोंदवला.
मोराड, तालुका जामनेर गावातील अरुण आनंदा पाटील यांनी पारंपरिक हस्तकलेतील आपले अनुभव, ज्ञान व कलानमुने विद्यार्थ्यांसमोर सादर केले. त्यांनी काचेच्या बाटलीमध्ये शेती उपयोगी नांगर, वखर, खाट विणकाम, रळी, बॉल आदींचे सजीव प्रात्यक्षिक सादर केले. अनेक विद्यार्थिनींनी प्रथमच पारंपरिक ग्रामीण हस्तकलेचे प्रत्यक्ष दर्शन घेतल्यामुळे त्यांच्यात या क्षेत्राविषयी नवीन उत्सुकता निर्माण झाली.सत्रानंतर प्रशासकीय अधिकारी श्री. प्रवीण कोल्हे यांच्या हस्ते अरुण पाटील यांना औपचारिक प्रोत्साहन पत्र प्रदान करण्यात आले. गोदावरी नर्सिंग कॉलेजने नेहमीच विद्यार्थिनींच्या सर्वांगीण विकासासाठी उपक्रमशीलता दाखवली आहे. फक्त वैद्यकीय शिक्षणापुरते न मर्यादित राहता, संस्थेने सामाजिक, आर्थिक व कौशल्याधारित उपक्रमांवर भर दिला आहे. कार्यक्रमास प्रा. मनोरमा कश्यप, प्रा. पियुष वाघ, इतर प्राध्यापकवर्ग, शिक्षकेतर कर्मचारी आणि विद्यार्थिनी मोठ्या संख्येने उपस्थित होते. कार्यक्रमाचे आयोजन कौशल्य विकास व विद्यार्थी कल्याण विभाग यांच्या वतीने करण्यात आले.सत्राचा समारोप विद्यार्थिनींनी सादर केलेल्या हस्तकलेच्या लघु प्रात्यक्षिकांद्वारे करण्यात आला. अरुण पाटील यांच्या मार्गदर्शनाखाली हा उपक्रम राबवण्यात आला.
