जळगाव एलसीबीसह अमळनेर पोलिसांची ग्रामीण रुग्णालयाजवळ कारवाई
अमळनेर ( प्रतिनिधी ) – शहरात दहशत माजवण्याच्या उद्देशाने २ गावठी पिस्तुल बाळगणाऱ्या गांधलीपुरा भागातील अनिल मोहन चंडाले याला जळगाव एलसीबी आणि स्थानिक पोलिसांनी घेराव घालून अटक केल्याची घटना २५ रोजी मध्यरात्री १२ वाजून १० वाजेच्या सुमारास ग्रामीण रुग्णालयाजवळ इंदिरा भुवन जवळ घडली. याबाबत अमळनेर पोलीस स्टेशनला गुन्हा दाखल करण्यात आला आहे.
एलसीबी चे हेडकॉन्स्टेबल विष्णू बिऱ्हाडे, दीपक माळी, रवींद्र पाटील हे अमळनेर शहरात रेकॉर्डवरील गुन्हेगार तपासत असताना त्यांना पोलीस उपनिरीक्षक सोपान मोरे यांनी कळविले की यावल येथील युवराज उर्फ युवा राजू भास्कर यांच्याकडे १ गावठी पिस्तुल आणि २ कडतुस सापडले आहे. भूषण कैलास सपकाळे रा. भुसावळ आणि समाधान बळीराम निकम रा. पाचोरा यांनी ३ पिस्तुल व ६ काडतुसे उमर्टी येथून आणले होते. भूषणने ते यूवराज भास्कर याला विकले आणि त्याने २ पिस्तुल व ४ काडतुसे अमळनेर येथील अनिल मोहन चंडाले याला विकले आहेत.
तपासातील मिळालेल्या माहितीनुसार त्यांनी पोलीस निरीक्षक दत्तात्रय निकम यांनी एलसीबी पोलिसांसह पोलीस निरीक्षक शरद काकळीज, संतोष नागरे, नितीन मनोरे याना अनिल चंडाले याला पकडण्यासाठी पाठवले. ग्रामीण रुग्णालयाजवळ इंदिरा भुवन जवळ अंधारात तो उभा असताना सर्व पोलिसांनी त्याला घेराव घालून त्याची कोंडी केली. त्याला पकडून त्याच्याजवळून २ गावठी पिस्तुल आणि ४ काडतुस असा ५२ हजार रुपयांचा मुद्देमाल जप्त केला आहे. अनिल व युवराज यांच्याविरुद्ध अमळनेर पोलीस स्टेशनला गुन्हा दाखल करण्यात आला आहे.
