दीपनगर येथे दोन कामगार जखमी
भुसावळ (प्रतिनिधी) : तालुक्यातील दीपनगर येथील नवीन प्रकल्पात स्फोट झाल्याने दोन कामगार गंभीर जखमी झाल्याची दुर्घटना घडली आहे. याप्रकरणी रविवारी दि. ६ रोजी कंपनीत धावपळ उडाली होती.
दिपनगरच्या नवीन ६६० मेगावॅट क्षमतेच्या प्रोजेक्टमध्ये गॅस कटींगचे काम सुरू असतांना अचानक मोठा स्फोट झाला. या दुर्घटनेत फुलगाव येथील दीपक बाविस्कर तसेच अमितकुमार हे दोन कंत्राटी कामगार जखमी झाले असून त्यांना उपचारासाठी खासगी रूग्णालयात दाखल करण्यात आले आहे. दोन्ही कामगार हे पॉवर मेक या खासगी कंपनीचे कामगार असल्याची प्राथमिक माहिती समोर आली आहे. या ठिकाणी अनेकदा लहानमोठे अपघात घडत असतात. तथापि, स्फोट झाल्यावर देखील जखमी कर्मचाऱ्यांना अगदी लागलीच प्रथमोपचार देखील मिळाले नाहीत, अशी माहिती काही कामगारांनी दिली आहे. या स्फोटाची चौकशी करून दोषींवर कारवाई करावी व जखमी झालेल्या कामगारांना योग्य ती भरपाई मिळावी अशी मागणी होत आहे.
