जळगाव शहरातील पिंप्राळा हुडको येथील घटना
जळगाव (प्रतिनिधी) – गरोदर असलेल्या पत्नीला गर्भ पाडावा यासाठी जबरदस्ती करुन, पत्नीला जबर मारहाण केल्याची घटना शहरातील पिंप्राळा हुडको भागात उघडकीस आली आहे. या प्रकरणी पत्नीच्या फिर्यादीवरुन पतीसह आणखी एका महिलेविरुध्द रामानंदनगर पोलिस ठाण्यात शुक्रवारी गुन्हा दाखल करण्यात आला आहे.
नंदिनी राहुल सावळे ( वय २९, रा.पिंप्राळा हुडको) या आपल्या कुंटूबासह वास्तव्याला आहेत. त्या गरोदर आहेत. मात्र, त्यांचा गर्भ पाडण्यात यावा यासाठी पती राहुल पुंडलिक सावळे (वय ३३) याने शुक्रवारी पहाटे ३ वाजेच्या सुमारास पत्नी नंदिनी सावळे यांना चापटा-बुक्क्यांनी मारहाण केली. तसेच पोटावर मारहाण केली. या प्रकरणी नंदिनी सावळे यांनी शुक्रवारी दुपारी रामानंदनगर पोलिस स्टेशनमध्ये जाऊन, पती राहुल सावळे व पार्वती मोहन सावंत यांच्या विरुध्द गुन्हा दाखल केला आहे.
दुसऱ्या घटनेत शहरातील मगर पार्क परिसरात मयुरी सचिन ठाकूर ( वय २८) यांचा ५ लाख रुपयांसाठी सासरच्या मंडळीकडून छळ होत असल्याचा प्रकार उघडकीस आला आहे. या प्रकरणी मयुरी ठाकूर यांच्या फिर्यादीवरुन पती सचिन ठाकूर, सासू प्रमीला ठाकूर यांच्यासह एकूण सहा जणांविरुध्द शहर पोलिस ठाण्यात गुन्हा दाखल करण्यात आला आहे.
