जळगाव शहरातील अयोध्या नगरातील घटना
जळगाव (प्रतिनिधी) : येथील अयोध्या नगर परिसरातील सलून चालकाने गळफास घेऊन आत्महत्या केल्याची धक्कादायक घटना मंगळवारी दि. ९ जुलै रोजी रात्री ९ वाजेच्या सुमारास उघड झाली आहे. याप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
निलेश सुरेश सोनवणे (वय २५, रा. अयोध्या नगर, जळगाव) असे मयत तरुणाचे नाव आहे. तो अयोध्या नगरात आई, वडील, १ भाऊ, २ बहिणी यांच्यासह राहत होता. शिवकृपा हेअर आर्ट हे त्याचे सलून दुकान होते.(केसीएन)त्यावरच परिवाराचा तो उदरनिर्वाह करीत होता. दरम्यान, मंगळवारी दि. ९ जुलै रोजी रात्री ८ वाजेच्या सुमारास निलेशने राहत्या घरी गळफास घेऊन आत्महत्या केली. कुटुंबियांच्या लक्षात येताच त्यांनी तत्काळ त्याला शासकीय वैद्यकीय महाविद्यालय व रुग्णालयात दाखल केले.
तेथे वैद्यकीय अधिकारी डॉ. अमोल पाटील यांनी तपासून मयत घोषित केले. यावेळी कुटुंबीयांनी एकच आक्रोश केला.(केसीएन)निलेशने यापूर्वी रेल्वे अप्रेंटीशीप केली होती. तसेच, तो नोकरीच्या शोधात होता. नोकरी मिळत नसल्याच्या नैराश्यातून त्याने आत्महत्या केली असावी असा पोलिसांचा प्राथमिक अंदाज आहे. याप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
