जळगाव शहरातील गांधीनगर येथील घटना
जळगाव (प्रतिनिधी) : शहरातील एका डॉक्टर दांपत्याला सैन्य दलातील जवानांची वैद्यकीय तपासणी करण्याच्या नावाखाली सव्वा लाख रुपयांमध्ये ऑनलाईन फसवणूक करण्यात आल्याचा प्रकार उघडकीस आला आहे. याप्रकरणी डॉक्टर दांपत्याने जिल्हा पेठ पोलीस स्टेशनला तक्रार दाखल केली आहे.
डॉ. सुजाता प्रमोद महाजन (६२, रा. गांधीनगर, जिल्हापेठ) या महिला डॉक्टरची १ लाख २४ हजार ९९२ रुपयांमध्ये फसवणूक झाली आहे. ही घटना दिनांक २१ मे रोजी घडली. याप्रकरणी सोमवार दि. १० जून रोजी अज्ञातांविरुद्ध जिल्हापेठ पोलिस ठाण्यात फसवणुकीचा गुन्हा दाखल करण्यात आला आहे. गांधीनगरात डॉ. सुजाता महाजन यांचे हॉस्पिटल असून दिनांक २० मे रोजी त्यांना एका अनोळखी क्रमांकावरुन फोन आला. समोरील व्यक्तीने त्यांना सैन्य दलातील अधिकारी बोलत असून तुमच्याकडे जवानांची तपासणी करायचे असल्याचे सांगितले. त्यासाठी त्याने व्हिजिटिंग कार्ड मागविले.
त्यानुसार डॉक्टरांच्या चालकाने त्याच्या मोबाईलवरुन कार्ड पाठवले. दुसऱ्या दिवशी डॉक्टर सुजाता महाजन यांचे पती प्रमोद महाजन यांच्याशी अज्ञात व्यक्तीने संपर्क केला त्याने ४० ते ५० जवानांची तपासणी करायचे असल्याचे सांगितले. डॉ. प्रमोद महाजन यांनी पत्नी डॉ. सुजाता महाजन यांचा फोन पे क्रमांक दिला. त्या वेळी संशयित आरोपीने डॉ. सुजाता महाजन यांच्यासोबत संपर्क साधून त्यांच्याकडून फोन पेची संपूर्ण माहिती घेतली.
त्यानंतर बोलणे सुरू असतानाच डॉ. महाजन यांच्या बँक खात्यातून पैसे ट्रान्सफर होवू लागले. काही वेळातच त्यांच्या खात्यातून १ लाख २४ हजार ९९२ रुपये ट्रान्सफर झाले.
या प्रकरणी त्यांनी दिनांक १० जून रोजी जिल्हापेठ पोलिस ठाण्यात फिर्याद दिली. त्यावरून संशयित आरोपीविरुद्ध गुन्हा दाखल करण्यात आला आहे.
