शस्त्रांचा धाक दाखवून केली जबरी लूट ; दौलत नगरातील घटना
जळगाव ;- शहरातील मोहाडी रोडवर असणार्या दौलत नगर येथे सहा जणांच्या बुरखाधारी दरोडेखोरांनी आज गाढ झोपेत असणाऱ्या कुटुंबियांना शस्त्रांचा धाक दाखवत सुमारे २३ लाखांचा ऐवज लुटून पोबारा केल्याची थरारक घाणा आज पहाटे येथे उघडकीस आली असून या घटनेमुळे कुटुंबीय प्रचंड भेदरली आहेत . घटनास्थळी पोलीस अधिकारी आणि कर्मचाऱ्यांनी धाव घेतली असून पोलीस घटनास्थळाची पाहणी करून अज्ञात दरोडेखोरांचा शोध घेत आहे .
याबाबत सूत्रांनी दिलेली माहिती अशी कि , दौलत नगर परिसरात पिंटू बंडू इटकरे (वय ३५) हे लोखंडी सामानाचे व्यापारी असून ते आपल्या पत्नी आणि मुलीसह राहतात. त्यांच्या तळमजल्यावर पार्कींग असून वर दोन मजले आहेत. आज सकाळी सव्वातीन वाजेच्या सुमारास हे तिन्ही जण गाढ झोपेत असतांना सहा जणांनी घरात प्रवेश केला. त्यांनी इटकरेंची पत्नी सौ. मनिषा यांना तोंड दाबून उठविले. तर पिंटू इटकरे यांना चाकू लाऊन घरात काय जे असेल ते काढून देण्यासाठी धमकावले. घाबरलेल्या इटकरे यांनी घरातील तीन लाख रोकड आणि २० लाखांचे दागिने घेतल्यानंतर धमकावत हे सहाही जण निघून गेले.
या सहा दरोडेखोरांपैकी पाच जणांनी संपूर्ण चेहरा झाकला जाईल असा बुरखा घातला होता. तर सहाव्याने तोंडावर विदूषकाचा मास्क लावला होता. सव्वा तीन ते चार वाजेपर्यंत ते इटकरे यांच्या घरात होते. येथून पलायन करतांना त्यांनी तळमजल्यावर लावलेल्या सीसीटिव्हीचा डीव्हाआर काढून घेतला. तर इटकरे पती-पत्नी या दोघांचा मोबाईल घेऊन तो खाली फेकून दिला.
भेदरलेल्या इटकरे दाम्पत्याने उजडल्यानंतर रामानंद नगर पोलीस स्थानकात धाव घेत या प्रकरणी तक्रार दाखल केली. यानंतर रामानंद नगर पोलिसांसह एलसीबीच्या पथकाने घटनास्थळी भेट देऊन पाहणी केली असून श्वान पथकही घटनास्थळी दाखल झाले होते . याबाबत गुन्हा दाखल करण्याचे काम सुरु आहे .
