जळगावमधील धक्कादायक प्रकार
जळगाव (प्रतिनिधी):- महाराष्ट्र सरकारची अत्यंत गाजलेली ‘मुख्यमंत्री माझी लाडकी बहीण’ योजना सध्या विविध कारणांमुळे चर्चेत आहे. मात्र, जळगावमधून या योजनेच्या नावाखाली एक अतिशय संतापजनक आणि माणुसकीला काळिमा फासणारी घटना समोर आली आहे. योजनेचे ई-केवायसी (e-KYC) करून देण्याच्या बहाण्याने एका महिलेकडे शरीरसुखाची मागणी करण्यात आली आहे.
आरोपी रमेश चव्हाण याने लाडकी बहीण योजनेसाठी आवश्यक असलेली कागदपत्रे आणि ई-केवायसी प्रक्रिया पूर्ण करून देतो असे आमिष दाखवले. याच बहाण्याने त्याने पीडित महिलेच्या घरी जाऊन तिच्याकडे शरीरसंबंधाची मागणी केली. या प्रकारामुळे धक्का बसलेल्या महिलेने घाबरून न जाता हिंमत दाखवली आणि थेट पोलीस स्टेशन गाठून तक्रार नोंदवली.
पोलिसांनी या प्रकरणाचा तपास सुरू केला असता, आरोपी रमेश चव्हाण याने केवळ याच महिलेसोबत नाही, तर आणखी एका महिलेसोबतही अशाच प्रकारचे गैरवर्तन केल्याचे उघड झाले आहे. दुसऱ्या एका प्रकरणात, एका महिलेचे निवृत्ती वेतन (पेन्शन) पुन्हा सुरू करून देण्याचे आमिष दाखवून तिच्याकडेही त्याने शरीरसुखाची मागणी केली होती.
या गंभीर प्रकाराची दखल घेत जळगाव शहर पोलीस ठाण्यात आरोपी रमेश चव्हाण विरुद्ध विनयभंगाचा गुन्हा दाखल करण्यात आला आहे. शासकीय योजनांच्या नावाखाली महिलांची अशी फसवणूक आणि शोषण करण्याचा प्रयत्न करणाऱ्या या विकृत प्रवृत्तीमुळे जळगाव परिसरात तीव्र संताप व्यक्त केला जात आहे.
शासकीय योजनांचे अर्ज भरताना किंवा ई-केवायसी करताना अधिकृत केंद्र किंवा सेतू कार्यालयातच जावे आणि अनोळखी व्यक्तींवर विश्वास ठेवू नये, असे आवाहन प्रशासनाकडून करण्यात येत आहे.
