जळगाव शहरातील संभाजीनगर परिसरातील घटना
जळगाव (प्रतिनिधी) : कार्यालयातून जात असताना दोन सुसाट दुचाकीची धडक झाली. या अपघातात उपप्रादेशीक परिवहन कार्यालयातील महिला सहाय्यक मोटार वाहन निरिक्षक जखमी झाल्या. मंगळवार दिनांक ३० रोजी सायंकाळी ही घटना महाबळ भागातील संभाजीनगर जवळ घडली. या प्रकरणी रामानंद नगर पोलीस स्टेशनचे कर्मचारी घटनेची माहिती घेण्याचे काम करीत होते.
श्रध्दा महाजन (वय ३८, रा. महाबळ परिसर) असे जखमी महिलेचे नाव आहे. उपप्रादेशिक परिवहन कार्यालयात त्या सहायक मोटार वाहन निरीक्षक आहेत. श्रद्धा महाजन कार्यालयातील ड्युटी आटोपून मंगळवारी संध्याकाळी घरी जाण्यासाठी निघाल्या. संभाजीनगर भागात भरधाव वेगात येणाऱ्या दुचाकीस्वाराने त्याना धडक दिली. या अपघातात कोसळून त्यांना दुखापत झाली. प्रकार कळताच उपप्रादेशिक परिवहन कार्यालयातील कर्मचाऱ्यांनी घटनास्थळी धाव घेतली.
दुचाकी वरील दोघांना ताब्यात घेत नागरिकांनी पोलिसांच्या स्वाधीन केले. जखमी श्रध्दा महाजन यांना तत्काळ वाहनातून शासकीय वैद्यकीय महाविद्यालय व रुग्णालयात उपचारासाठी दाखल केले. त्यांच्यावर याठिकाणी तातडीने उपचार करण्यात आले. त्यानंतर महाजन यांना वाहनातून त्यांच्या घरी नेण्यात आले. घटनेची रामानंदनगर पोलीस माहिती घेत होते.
